بے کچ نیاڑی تا بے حرمتی ئِ کننگا، ڈیہہ ٹی دیرپا امن کن کشمیرنا ویل ئِ اقوام متحدہ نا قرارداد آتا ایسر کننگے
اسلام آباد۔ 19 ستمبر (اے پی پی) صدر مملکت ممنون حسین پارینے کہ بھارت مقبوضہ کشمیر اٹی ظلم انا بازار ئِ گرم کرینے ہرانا نتیجہ ٹی تدینگوک آ گڑاس تو تا وخت آ سد آں زیات بندغ ئِ شہید کننگا و بے کچ نیاڑی تا بے حرمتی ئِ کننگانے ولے داسا وخت بسنے کہ جہانی برادری بھارت نا دابیدادی تا نوٹس ئِ ہلسا مظلوم کشمیری الس نا حق خودارادیت کن توار ہرفے وخت اس کہ اٹلی نا وزیر دفاع سین روبر ٹا پینوتی مقبوضہ کشمیر اٹی انسانی حق انا خلاف ورزی و ممنوعہ سلہہ غاتا کاریم اٹ اتنگ نا مذمت ئِ کرسا پارینے کہ اٹلی نا حکومت دا ویل ئِ جہانی برادری نا مون آ پبی وڑاٹ چست کیک۔ صدر مملکت اٹلی نا وزیر دفاع سین روبر ٹا پینوتی نا سروکی ٹی ڈل اتون ایوان صدر اٹی دوشنبے آ اوڑدہی نا وخت آ ہیت وگپ کرسا پارے کہ جہانی برادری بھارت آ زورشاغے کہ او بے گناہ کشمیری تیا بیداد نا کارروائی تے دمدستی بند کے و ڈیہہ ٹی دیرپا امن کن کشمیر نا ویل ئِ اقوام متحدہ نا قرارداد آتا رداٹ ایسر کننگے۔
