اسلام آباد۔ 19 ستمبر (اے پی پی) مسکوہی سفیر مشتاق مہر پارینے کہ وزیراعظم محمد نواز شریف نا اقوام متحدہ نا جنرل اسمبلی آن تران متاثر کن مریک۔ ریڈیا پاکستان تون ہیت وگپ کرسا اوپارے کہ اقوام متحدہ نا جنرل اسمبلی نا 71می دیوان اٹی وزیراعظم نواز شریف نا چارمیکو تران متاثر کن مریک ہراٹی وزیراعظم کشمیر نا ویل ئِ جہانی برادری نا مون آ پبی وڑاٹ تالان کیک۔ اوپارے کہ پاکستان مسلم لیگ (ن) نا حکومت ہندن ئُ خارجہ پالیسی اس مرتب تسنے ہرانا مقصد ہمسایہ ملک آتون اوار ایلو ملک آتیان گچین و دوستانہ تعلقداری تے استوار کروئی ئِ۔ مقبوضہ کشمیر نا علاقہ اڑی ٹی پیش بروک آ واقعہ نا بابت ہریفوک آ سوج انا ورندی ئِ ترسا اوپارے کہ دا واقعہ نا پداٹ ہچ ئُ جہانی و علاقائی عوامل اس کارفرمااف بلکن دا کودک کشمیری الس آ کروک آبھارتی ظلم انا ردعمل مننگ کیک۔ مسکوہی سفیر پارے کہ وزیراعظم نواز شریف نا تران آن حالیت آک بد ل مریرہ و جہانی برادری نا توجوہ مقبوضہ کشمیر اٹی بھارتی ظلم انا کنڈا مبذول مریک و جہانی برادری دا ویل انا پرامن ایسری نا کنڈا کاہک۔
