پاکستان ایشیانا ترندی اٹ شون ہلسا معیشت آتا صف اٹی اوڑدہ مسنے، وزیراعظم
مقبوضہ کشمیر نا الس نا حق خودارادیت کن جاری پرامن جہد نا اخلاقی ، سیاسی و سفارتی مخ تفی ئِ کرسا کینہ
نیویارک۔ 19 ستمبر (اے پی پی) وزیراعظم محمد نواز شریف پارینے کہ پاکستان مقبوضہ کشمیر نا الس نا حق خودارادیت کن جاری پرامن ہندی جہد نا اخلاقی ، سیاسی و سفارتی مخ تفی ئِ کرسا کیک۔ یک شنبے آ نیویارک آ سرمننگ آن دمدستی گڈ پاکستانی کمیونٹی نا باسک آتون ہیت وگپ کرسا وزیراعظم دا عزم انا اعادہ ئِ کرے کہ کشمیر نا ویل انا اقوام متحدہ نا قرارداد آتا رداٹ ایسرمقبوضہ و جموں و کشمیر نا الس ئِ حق خودارادیت تننگ آن ہی مننگ کیک ہرا کشمیری الس نا است خواہی تا رداٹ مرے۔ اوپارے کہ مقبوضہ کشمیر نا الس جہد آجوئی ئِ سرسہبی اتون تینا کیہی نسل آتے گدریفینے و داسا کشمیری ورناک تحریک آجوئی ٹی پوسکنا جوش و جوزہ ئِ اوار کرینو۔ اوپارے کہ بھارت ئِ دا حقیقت ئِ امنا کروئی مرے کہ مقبوضہ کشمیر اٹی انسانی حق انا خلاف ورزی تا دمدستی خاتمہ المی ئِ۔ اودے داہیت ئِ ہم امنا کروئی مریک کہ کشمیری الس نا رائے نا شرف ئِ کننگے۔ وزیراعظم پارے کہ اینو نا پاکستان 2013ءنا مقابلہ ٹی بھاز گچین ئِ ۔ اوپارے کہ پاکستان داوخت آ جہانی برادری ٹی سیاسی وڑاٹ سوگو، زیات رکھوک و معاشی بابت آن سوگو ملک انا ہند اس دوئی کرینے۔ وزیراعظم پارے کہ پاکستان ایشیا نا ترندی اٹ شون ہلسا معیشت آتا صف اٹی اوار مسنے و بین الاقوامی مالیاتی ادارہ، ریٹنگ ایجنسی و جہانی کہول آ پنی کیہی جریدہ غاک داہیت انا اعتراف ئِ کیرہ۔ اوپارے کہ نن تینا ملک آن دہشت گردی و انتہاءپسندی نا پورو خاتمہ، معیشت نا بحالی و توانائی نا بابت خود انحصاری آ پبی توجوہ تخنگ ئُ۔ وزیراعظم پارے کہ الحمداللہ سیکورٹی و کانود نافذ کروک آ ادارہ، پولیس نا بے مثل قربانی و مچ آ قوم انا بے مثل عزم انا نتیجہ ٹی ملک انا سیکورٹی حالیت آتیٹی نمان گچینی مسنے۔نن قومی اتفاق رائے ودی کننگ آن پد آپریشن ”ضرب عضب“ و نیشنل ایکشن پلان آ عملدرآمدنا بنائِ کرین ہرانا نتیجہ ٹی ملک آن دہشت گردی کم مننگ ئِ و انشاءاللہ زوت ہی ملک دا کینسر آن نجات دوئی کیک۔ وزیراعظم پارے کہ نن توانائی نا تنکی ہراڑآن ننا الس بھلو وخت اسے آن زہمی مسکہ، آنا مون ئِ توننگ اٹی سرسہب مسونن۔ ملک انا کیہی بشخ آتیٹی چاگڑد دوست توانائی تون اوار توانائی نا کیہی پیداواری ڈٹ آتیا سرسہبی اٹ پورو کننگ انگ ئُ و 2018 ءنا بنا اسکان تقریباََ 10 ہزار میگاواٹ بجلی قومی گریڈ اٹی اوار مریک۔ اوپارے کہ نن تینا حکومت نا ساڑی آ دور انا پوروی اسکان پاکستان الس تون کروک آ تینا وعدہ غاتے پورو کینہ و 2018 ءاسکان ملک آن لوڈشیڈنگ نا پورو خاتمہ ئِ کننگک۔ وزیراعظم محمد نواز شریف پارے کہ ملکی تاریخ اٹی اولیکو وار ملک انا طول وعرض اٹی بنداوی ڈھانچہ نا شون نا 850 ارب روپئی آن زیات نا کیہی شونداری ڈٹ بناءکننگانو و شون نا عمل اٹی ہچ ئُ صوبہ و علاقہ اس پد سلپک و نن داہیت ئِ باوری جوڑ کینہ کہ ملک انا غٹ بشخ آک شون نا داعمل اٹ اسہ وڑاٹ مستفید مریر۔ وزیراعظم پارے کہ چین پاکستان اقتصادی راہداری ڈٹ صرف گیم چینجر اس ثابت مفک بلکن داڑآن مچ آ ڈیہہ نا تقدیر بدلینگک۔ راہداری ڈٹ انا رداٹ خصوصی اقتصادی زونز انا اڈتننگ آن مچ آ ملک اٹی روزگار نا وارخواہی ودی مریک ہراڑآن نیزگاری ٹی نمان کمتی واقع مریک۔ اوپارے کہ ہنداسوب ئِ کہ ننے پاکستان نا روشن آخبت نا اومیت ئِ و مسکوہی مسہ سال انا وخت کل گڑاک الس نا مون آٹی ئُ۔ تینا ہیت وگپ نا ایسری آ وزیراعظم پارے کہ راجی و اقتصادی شون و داخلی سلامتی نا بابت سرسہبی تا سفر قوم انا کمک اٹ برجاءسلک۔
