اسلام آباد۔ 09 ستمبر (اے پی پی) فاٹا اصلاحات 2016ءآ کمیٹی نا رپورٹ قومی اسمبلی ٹی پیش کننگانے وخت اس کہ کمیٹی نا سروک سرتاج عزیز پارینے کہ کمیٹی ہفت ایجنسی تا دورہ ئِ کرے ، نن اوفتا مون آ فاٹا ئِ خیبر پختونخواٹی ضم کننگ، جتا صوبہ اس جوڑ کننگ، گلگت بلتستان طرز آ حق حکمرانی تننگ یا ساڑی آ حالیت آتے ٹی برقرارتخنگ نا 4آپشن تخان واہم گیشتری خیبر پختونخوا ٹی ضم مننگ نا حق اٹی رائے تسر۔ جمعہ آ قومی اسمبلی نا دیوان نا وخت وزیراعظم نا سلاہکار خارجہ سرتاج عزیز خارجہ امور، فاٹا اصلاحات 2016ءآ کمیٹی نا رپورٹ ئِ ایوان اٹی پیش کرے۔ اوپارے کہ پاکستان نا اڈہلنگ آن داوخت اسکان فاٹابے چیٹی حالیت آتا گواچی مس، نائن الیون آن گڈ فاٹا ٹی بدامنی و ایلو ویل آتیٹی ودکی مس، وزیراعظم گورنر کے پی کے و ایلو فتیا تالان کمیٹی اس اڈ تس ہراشش تو اٹی فاٹا نا 7 ایجنسی تا دورہ ئِ کرے۔ ایف آر او وملک آتون ہیت کرین۔ نن اوفتا مون آ چار سلاہ پیش کرین کہ فاٹا نا ساڑی آ حالیت آتے برقرار تخنگے یا فاٹائِ جتا صوبہ اس جوڑ کننگے یا فاٹائِ کے پی کے تون ضم کننگے۔ دا غٹ عمل نا نتیجہ دوئی مس۔ گیشتری جتا صوبہ اس جوڑ کننگ نا مخ تفی ئِ کتوس۔ گیشتری نا خیال ئس کہ فاٹا ئِ کے پی کے ٹی ضم کننگے۔ اوپارے کہ داکاریم دمدستی وڑاٹ مننگ کپک۔ داڑکن گڑاس وخت درکار ئِ۔ ہموڑے بلدیاتی گچین کاری تے کرفنگے، ہائی کورٹ و سپریم کورٹ نا بنچ اس اڈ ہلیک۔ سیکورٹی گچین کننگے، لیویز نا کچ ئِ ودفنگ نا سلاہ تننگانے۔ طالب علم آتا کوٹہ ئِ ودفنگ نا ہم سلاہ تننگانے۔ اوپارے کہ نن رپورٹ ئِ ایوان اٹی پیش کرینن اوڑآ شرہ آن پد پین سلاہ ہم مون آ بریک۔
