اسلام آباد۔27جولائی ( اے پی پی) چاریں صوبہ آں چہ الیکشن کمیشن ئِ نوک گچین بوتگیں باسکاں پنچ سال ئِ ھاترئَ وتی عہدگ ئِ سوگند چست کتگ۔ چیف الیکشن کمشنر جسٹس(ر) سردار محمد رضائَ آھاں چہ سوگند زُرتگ۔ سوگند چست کنگئِ مراگش چارشمبے ئِ روچئَ الیکشن کمیشن بابر یعقوب ئَ ھوار کمیشن ئِ مزنیں حکام ھوار بوتگ اَنت۔ سوگند چست کنوکانی تہا پنجاپئَ چہ جسٹس(ر) الطاف ابراہیم قریشی، سندھ ئَ چہ عبدالغفار سومرو، بلوچستانئَ چہ جسٹس(ر) شکیل بلوچ، خیبر پختونخوا ئَ چہ جسٹس(ر) ارشادقیصر ھوار اَنت۔ اے باسکانی گچین کاری حکومت ءُ اپوزیشن ئِ نیمگئَ چہ داتگیں نامانی تہا کنگ بوتگ۔ الیکشن کمیشن ئِ دو باسکانی مدت اڑھائی سال ئَ پد قرعہ اندازی ءِ وسیلگئَ ھلاس بیت کہ ایشیئَ چہ پد پنچ سالئِ ھاترئَ دو نوکیں باسک گچین کنگ بنت۔ الیکشن کمیشن ئِ چاریں باسکاں چہ سوگند زورگ ئَ پد الیکشن کمیشن سرجم بوتگ کہ ایشیئَ چہ پد پشت کپتگیں ضمنی گچین کار یئَ ھوار دگہ کار زوت گیشءُ گیوار بوھگئِ اُمیت است اِنت۔
