اسلام آباد۔ 27جولائی (اے پی پی) صدر پاکستان مسلم لیگ (ن) وزیراعظم محمد نواز شریف نا کماشی ٹی آزاد کشمیر کانود ساز اسمبلی ٹی پارلیمانی پارٹی نا دیوان اٹی مسلم لیگ (ن) آزاد کشمیر نا صدر راجہ فاروق حیدرخان ئِ بروک آ وزیراعظم پندار کننگانے۔ پارلیمانی پارٹی نا دیوان چارشنبے آوزیراعظم ہاﺅس اٹی محمد نواز شریف نا کماشی ٹی اڈ ہلک ہراٹی بنجائی وزیر چوہدری نثارعلی خان، چوہدری برجیس طاہر، وزیراعظم نا خصوصی کمکار ڈاکٹر آصف کرمانی ، مسلم لیگ(ن) نا بنجائی کسرشون راجہ ظفرالحق ، مسکوہی وزیراعلیٰ خیبر پختونخوا سردار مہتاب احمد خان، مسلم لیگ (ن) نا بنجائی نائب صدر و آزاد کشمیر نا مسکوہی وزیراعظم سردار سکندرحیات خان آن بیدس آزاد کشمیر کانود ساز اسمبلی نا پوسکن گچین مروک آ باسک آک شرکت کریر۔ داوخت آ آزاد کشمیر نا بروک آ وزیراعظم وڑاٹ راجہ فاروق حیدر خان ئِ پندار کننگا۔ یات سلے کہ 21جولائی آ مروک آ آزاد کشمیر نا لس گچین کاری تیٹی مسلم لیگ (ن) 41مہشون آتیان 31مہشون دوئی کرے وخت اس کہ اسہ مہشون اس اونا اتحادی جماعت جموں کشمیر پیپلزپارٹی دوئی کرے۔ مسلم لیگ (ن) ئِ آزاد کشمیر اٹی صفائُ اکثریت اس دوئی مس۔
