اسلام آباد۔25جولائی (اے پی پی) وزیراعظم محمد نواز شریف پارینے کہ نن کابل اٹی مروک آ دہشت گردجلہو نا افسوزناک سانحہ غا اوغانستان تون ہم کوپہ سلوک اُن، پاکستان دہشت گردی نا برخلاف جنگ اٹی اوغانستان تون تینا کمک ئِ برجاءتخنگ کن پرعزم ئِ۔ وزیراعظم اوغان صدر اشرف غنی ئِ ٹیلی فون کرے وپارے کہ پاکستان نا حکومت و الس 23جولائی آ کابل اٹی مروک آ دہشت گرد جلہو نا افسوز ناک سانحہ غا اوغانستان نا شانہ بشانہ سلوک ئُ۔ دوشنبے آ وزیراعظم آفس آن برجاءکروک بیان نا رداٹ دہشت گرد آتا بہیمانہ کارروائی و انسانی جان تا بے رحمانہ خون نا ترندی اٹ مذمت ئِ کرسا وزیراعظم دا گھناﺅجلہو اٹی تپاخت کروک آتا وارث آتون ہمدردی نا درشانی ئِ کرے و ٹھپی مروک آتا زوت جان جوڑی کن دعا کرے۔ دہشت گردآتے ہڑتوم آ ملک آتا اسیجا ءدژمن گوندسا وزیراعظم پارے کہ پاکستان دہشت گردی نا برخلاف جنگ اٹی اوغانستان تون تینا کمک ئِ برجاءتخنگ کن پرعزم ئِ۔اوغان صدر اشرف غنی دامشکل وخت آ اوغان حکومت الس تون یکجہتی نا درشانی کننگ آ وزیراعظم محمد نواز شریف نا منت واری ئِ ادا کرے۔ اوغان صدر پارے کہ ہڑتوم آ ملک آتے دہشت گرد آتا پدریسہ جلہو آتا مون تروکی ئِ۔ اوبرادر ملک انا حیثیت آن اوغانستان نا الس کن ڈکھ و افسوز نا درشانی کننگ نا ستائِ کرے۔ اوغان صدر باوری ترفے کہ دہشت گردی نا برخلاف جنگ اٹی ہم متحداُن۔
