اسلام آباد۔ 21جولائی (اے پی پی) بنجائی وزیر خزانہ سینیٹر اسحاق ڈار پارینے کہ الیکشن کمیشن نا باسک آتا تقرری نا وڑوڈول آئین اٹی ساڑی ئِ ، آئینی مد نا تہہ ٹی باسک آتا تقرری ئِ کننگک۔ پنچ شنبے آ پارلیمنٹ ہاﺅس نا پیشن اپوزیشن لیڈر سید خورشید احمد شاہ تون اوار پریس کانفرنس آن تران کرسا اوپارے کہ تدوک آ منہ ہفتہ آن اپوزیشن لیڈر سید خورشید شاہ تون الیکشن کمیشن نا باسک آتا تقرری نا بابت میٹنگز مسنے۔ آئین نا رداٹ 45دے انا تہہ ٹی الیکشن کمیشن نا باسک آتا تقرری المی ئِ۔ اوپار ے کہ ہر صوبہ آن مسہ مسہ پن تیا اپوزیشن لیڈر و حکومتی اتحادی جماعت آتون اتفاق مسنے۔ اپوزیشن لیڈر ہر صوبہ آن مسہ مسہ پن اسپیکر قومی اسمبلی ئِ گدریفک و ہنداوڑ حکومت نا کنڈآن ہم ہر صوبہ آن مسہ مسہ پن اسپیکر قومی اسمبلی ئِ گدریفنگک ۔ اوپارے کہ پارلیمانی کمیٹی نا دیوان 25جولائی آ دہ ئُ نیم بجہ غا پارلیمنٹ ہاﺅس اٹ اڈ ہلیک۔ کمیٹی ٹی ہر صوبہ آن اسہ اسہ پن آ اتفاق مریک و ہمودے الیکشن کمیشن نا باسک آتا نوٹیفکیشن کننگک۔ اوپارے کہ ہر چار آ صوبہ غاتیان مسہ مسہ پن تیٹی ٹیکنو کریٹ ، ریٹائرڈ جج و ریٹائرڈ بیورو کریٹ ہم ہلینہ ۔ داوخت آ قومی اسمبلی ٹی اپوزیشن لیڈر سید خورشید احمد شاہ پارے کہ حکومت و اپوزیشن نا نیام اٹ الیکشن کمیشن نا باسک آتا تقرری نا بابت ہر صوبہ آن مسہ مسہ پن پارلیمانی کمیٹی ئِ گدریفنگ آ اتفاق مسنے۔ اوپارے کہ کانود نا رداٹ حکومت و اپوزیشن تولسا دابابت آن فیصلہ کروئی ئسک۔ اوپارے کہ لیڈر آف دی ہاﺅس و لیڈر آف دی اپوزیشن نا فائنل کننگ آن گڈ پن پارلیمانی کمیٹی ئِ کاہک۔ دا اسہ امانت اسے، اوٹی خیانت مفئے ہراڑآن مسکوہی آمبار الس فریشاں مفئے۔ داوار الیکشن کمیشن نا باسک آتا مسکوہی ئِ مون آ تخسا متنازعہ خلقت آتے مون آ ہتپننگ آ اتفاق مسنے۔ اوپارے کہ نن تینا کنڈآن ہر ممکن کوشست کرینن کہ دننگا بندغ آتے مون آ اتنگپ ہرافتا مسکوہی سیاسی مرے، داہم کوشست ارے کہ اسیجائی پن مریر ، ہموفتے مون آ ہتنگے۔ دابابت میڈیا زیات آن زیات کڑد ادا کے۔ اوپارے کہ اپوزیشن نا غٹ جماعت آتا صلابت آن پن تننگ انگ ئِ ۔ اوپارے کہ کوشست کرینن کہ الیکشن کمیشن ئِ متنازعہ جوڑ کننگپ۔ اوپارے کہ دابابت اپوزیشن جماعت، پاکستان تحریک انصاف نا شاہ محمود قریشی، قومی وطن پارٹی نا سروک آفتاب شیر پاﺅ، ایم کیو ایم و ایلو جماعت آک ہم تینا تینا پن تے تسنو۔
