اسلام آباد۔ 20جولائی (اے پی پی) اسپیکر قومی اسمبلی سردارایا صادق پارینے کہ مقبوضہ کشمیر اٹی کودک و بے گناہ کشمیری تیا بھارتی ظلم انا جہانی برادری ئِ نوٹس ئِ ہلوئی مرے۔ وخت بسنے کہ کشمیر نا ویل ئِ اقوام متحدہ نا قرارداد و کشمیری الس نا است خواہی تا رداٹ ایسر کننگے۔ چارشنبے آ کشمیری الس تون یکجہتی نا درشانی نا وڑاٹ اڈ تروک آ یوم سیاہ نا وخت آ لند ن آن ٹیلی فون آ ”اے پی پی“ تون ہیت وگپ کرسا اسپیکر قومی اسمبلی سردار ایاز صادق پارے کہ اوہم داڑے لندن اٹی تینا دوآ مون ئُ پٹی اس تفسا کشمیری تیا ظلم انا برخلاف برانز اٹی بشخ ہلکونے۔ اوپارے کہ بھارتی فورسز آک کشمیری الس آ ظلم انا انتہائِ کرینو۔ کشمیری تے حق دوئی ارے کہ او تینا آخبت نا فیصلہ ئِ کننگ کیرہ، مقبوضہ کشمیر نا بابت اقوام متحدہ نا قراردادآک ساڑی اریر ہرافتے مون آتخسا کشمیری الس ئِ حق خودارادیت بایدے ملے۔ اوجہانی برادری آ زورشاغا کہ وخت بسنے کہ کشمیری الس آ بھارتی ظلم انا اقوام متحدہ تون اوار غٹ جہانی برادری ئِ سخت نوٹس ہلوئی مرے۔ اوپارے کہ لندن اٹی اڈکننگ نا وخت او ہاﺅس آف لارڈ نا اسپیکر تون اوڑدہی ٹی ہم او کشمیر نا ویل ئِ پبی وڑاٹ تالان کرے۔ ای اوڑدہی ٹی داہیت آ زورشاغانٹ کہ مسکوہی کیہی دہائی آن کشمیر نا ویل آ بھارت نا جان بڈی نا چرجوئی برجائِ۔ برطانیہ ئِ گہری است خواہی ہلسا ویل ئِ ایسر کننگ کن تینا کڑد ئِ ادا کروئی مرے۔ اوپارے کہ مقبوضہ کشمیر اٹی سوز ہلالی بیرک ئِ چست کننگ آن صفا ئِ کہ کشمیری الس پاکستان تون الحاق خوارہ۔ کشمیری تا داخواہش نا شرف ئِ کروئی مرے۔
