اسلام آباد۔ 19جولائی (اے پی پی) پاک فوج انا شعبہ تعلقات عامہ (آئی ایس پی آر) نا ڈائریکٹر جنرل لیفٹیننٹ جنرل عاصم سلیم باجوہ پارینے کہ انفارمیشن بیسڈ آپریشن نا وخت سندھ ہائی کورٹ نا چیف جسٹس نا مار اویس شاہ ئِ بحفاظت بازیاب کرفنگانے، برمتہ گر تا دیکی سیم انا ذریعہ اویس شاہ ئِ اوغانستان آ دننگ نا کوشست ئِ بے سہب جوڑ کننگانے۔ آپریشن نا وخت آ ہرمسٹ آ دہشت گرد آک خلنگانو۔ سے شنبے آ ڈی جی آئی ایس پی آر لیفٹیننٹ جنرل عاصم سلیم باجوہ پریس کانفرنس نا وخت آ پارے کہ سیکورٹی فورسز و انٹیلی جنس ادارہ غاک چیف جسٹس نا برمتہ مروک آ مار انا ممکنہ نقل و حرکت نا بابت اودیم احوال ملنگ آ ڈیرہ اسماعیل خان اٹی پیش تموک آ کسر تا چیکنگ ئِ سخت کریر ، ہندا وخت آ خرن رنگ انا سرف گاڈی اس بس تو سیکورٹی کارندہ غاک اودے توننگ نا اشارہ کریر ، ڈیور گاڈی ئِ توننگ آن بیدس ایلو کنڈ آ ہنوک آ روڈ آ دننگ کن ڈیوائیڈر آ لگفے ہراڑآ سیکورٹی کارندہ غاک ڈیور ئِ نشانہ جوڑ کریر، ہنداوخت آ پد آن تولوک آ ایلو اِرا دہشت گرد آک دڑنگار و نرنگ نا کوشست کریر تو ہنداوخت آ سم کاری نا تبادلہ ٹی ہڑتوم آ دہشت گرد آک خلنگار۔ اوپارے کہ ہر مسٹ آ دہشت گرد آتا خلنگ آن گڈ گاڈی نا تہہ ٹی تلاشی نا بنائِ کننگا تو اسہ کنڈ ا برخہ ٹی تولوک بندغ ئِ نشان تننگ نا پاننگا ولے بھاز کوشست آن پد او نہ پارے کہ نقاب ئِ مر کننگاتو او بندغ نا باغاپیچ خلوک ئس ، سیکورٹی کارندہ غاک بیچ آتے کشار تو دا ورناپارے کہ ای چیف جسٹس سندھ ہائی کورٹ نا مار اویس شاہ اُٹ، کنے کراچی آن برمتہ کننگاسس ہراڑآ سیکورٹی کارندہ غاک داورنائِ خڑک انا کیمپ اٹی گدریفیر۔ اوپارے ہراتم اویس شاہ ئِ بازیاب کرفنگاتو اووخت آ اونا دوک و نک چین اٹ تفوک ئسر۔ اوپارے کہ خڑک انا کیمپ اٹی گدریفنگ نا سوب اویس شاہ نا دوو نت تیا خلوک آ چین تیان آجوئی ترفنگا۔اسہ سوج اسینا ورندی ٹی لیفٹیننٹ جنرل عاصم سلیم باجوہ پارے کہ گڑاس ہندن ئُ احوال رسینگاسس کہ برمتہ گر اویس شاہ ئِ دیکی سیم آن اوغانستان آ گدریفنگ خوارہ ۔ اسہ سوج اسینا ورندی ٹی اوپارے کہ داوخت اسکان ملوک آ احوال و شواہد آتا رداٹ چیف جسٹس نا مار ئِ برمتہ کروک آتا تعلق ٹی ٹی پی و گڑاس لنکس ایلو دہشت گرد تنظیم آتیان ہم ارے۔ اوپارے کہ دہشت گرد آتا برخلاف پاک فوج نا سرسہب آپریشن ضرب عضب نا سوب مچ آ ملک اٹی دہشت گردی نا کارروائی تے ٹی بھلو حد اسسکان کمتی بسنے۔ اوپارے کہ دہشت گرد آتا برخلاف انفارمیشن بیسڈ آپریشن مچ آ ملک اٹی جاری ئِ و دا آپریشن آخریکو دہشت گرد نا چٹفنگ اسکان برجاءسلک۔ اوپارے کہ داوخت اسکان 19ہزار 800 انفارمیشن بیسڈ آپریشن کننگانے، ہراٹی بھاز انگا دہشت گرد آک خلنگار و گڑاس دزگیر ہم مسنو۔ اسہ سوج اسینا ورندی ٹی اوپارے کہ دہشت گردآتا اسہ حربہ اہم شخصیت آتا چناتے نشانہ جوڑ کننگ، برمتہ کننگ ہم ارے۔ ڈی جی آئی ایس پی آر دہشت گردی نا چٹفنگ نا بابت میڈیا نا مثبت کڑد انا ستائِ کرے و اومیت ظاہر کرے کہ آخبت اٹی ہم ہنداوڑمثبت کمکاری برجاءسلک۔
