اسلام آباد۔ 19جولائی (اے پی پی) ڈائریکٹر جنرل رینجرز سندھ بنجائی وزیر داخلہ چوہدری نثارعلی خان تون رابطہ کرسا سندھ اٹی رینجرز واک آتا نوٹیفکیشن اٹی تاخیر نا بابت صلابت کرے ۔ سے شنبے آ وزارت داخلہ نا کنڈآن جاری مروک آ بیان نارداٹ بنجائی وزیر داخلہ چوہدری نثارعلی خان ڈی جی رینجرز سندھ اتون ہیت وگپ کرسا پارے کہ رینجرز نا جوان و افسر آک تینا جان تا پروہ ئِ کپرسا کراچی ٹی امن عامہ نا حالیت آتے گچین جوڑ کریر، اوفتا خواری و کوشست آتے ہچ ئُ دروشم اسے ٹی زیان مننگ کن ہلنگ پننگک۔ اوپارے کہ سندھ اٹی رینجرز نا تعیناتی و کراچی آپریشن نہ صرف غٹ اسٹیک ہولڈرز بشمول صوبائی و بنجائی حکومت آتا تین پہ تینی صلابت و فیصلہ آن گڈ شروع کننگا بلکن اونا پداٹ بڑزکو عدلیہ نا صفا پارت آک ہم اوار ئسر۔ وزیر داخلہ پارے کہ رینجرز واک آتا ودیکی نا معاملہ ٹی بنجائی حکومت تینا آئینی و کانودی کڑد ئِ ادا کرسا کیک۔
