اسلام آباد۔ 19جولائی (اے پی پی) صدر مملکت ممنون حسین پارینے کہ حکومت ملکی برآمدات آتے مون آ دننگ و قومی معیشت ئِ پین سوگو جوڑ کننگ کن صنعت کار و پوریاگر آتے آسراتی و سازگار چاگڑد تننگ کن ٹھوس گام گیج کننگ ئِ۔ داہیت ئِ او مختار احمد نا سروکی ٹی سرگودھا چیمبر آف کامرس اینڈ انڈسٹری نا ڈل اتون ایوان صدر اٹی اوڑدہی نا وخت آ پارے۔ صدر مملکت ڈل ئِ باوری ترفے کہ حکومت دوئی وسیلہ غاتے ٹی سلسا کاروباری و صنعتی بشخ ئِ غٹ آسراتی ایتک۔ صدر مملکت حکومت نا اقتصادی پالیسی تا ستائِ کرسا پارے کہ دا پالیسی تا سوب بین الاقوامی ادارہ غاک پاکستان ئِ ایمرجنگ مارکیٹس انڈیکس اٹی اوار کرینے۔ صدر مملکت پاک چائنہ اقتصادی راہداری نا ذکر ئِ کرسا پارے کہ دا ڈٹ آتا پوروی آن قومی معیشت پین سوگو مریک و پوریا گر و صنعت کار آتے داڑآن فائدہ ہرفنگ کن تیار سلوئی مرے۔ سرگودھا چیمبر آف کامرس نا صدر ڈرائی پورٹ، سمال انڈسٹریز اسٹیٹ و سرگودھا ٹی نیاڑی یونیورسٹی نا اڈتننگ نا چرجوئی ٹی چیمبر ئِ مون تروک ویل آتا بارواٹی صدر مملکت ئِ معلومدار کریر۔
