اسلام آباد۔ 19جولائی (اے پی پی) صدر مملکت ممنون حسین پارینے کہ ٹیلی مواصلات آتا بشخ اکن حکومت نا وژن معیشت و راج انا مفاداٹی کھلی، مسابقانہ و منظم مارکیٹ آتا کمک اٹ ٹیلی مواصلات نا ہڑزان و معیاری خذمت آتا قومی کہول آ دوئی ئِ باوری جوڑ کروئی ئِ۔ اوداہیت ئِ انٹرنیشنل ٹیلی کمیونیکیشن یونین (آئی ٹی یو) نا سیکرٹری جنرل ہولین ژاﺅ تون ہیت وگپ کرسا پارے ہراک سے شنبے آ ایوان صدر اٹی تینا ڈل اتون اوار اوڑتون اوڑدہی کریر ۔ وزیر مملکت انفارمیشن ٹیکنالوجی انوشہ رحمان ہم داوخت آ ساڑی ئسک۔ صدر مملکت پارے کہ حکومت جامع ٹیلی کمیونیکیشن پالیسی 2015ءئِ وضع کرینے۔ اومیت ئِ کہ داڑآن راجی و اقتصادی شون ئِ مون آ دننگک و دا علم آ مبنی راج انا دوئی ٹی کمکار کڑد اداکیک۔ صدر ممنون حسین پارے کہ پاکستان اٹی ٹیلی مواصلات نا بشخ معیشت اٹی بے کچ متحرک کڑدادا کروک آ بشخ آتیان اسٹ ئِ و مسکوہی پنچ سال انا وخت دا بشخ 7ارب ڈالر آن زیات نا براہ راست درملکی زرکاری راغب کرے ہرا حکومت نا ریگولیٹری و پالیسی فریم ورک نا عمدہ امتزاج نا عکاس ئِ۔ صدر ممنون حسین پارے کہ پاکستان 1947ءآن آئی ٹی یو نا باسک ئِ و او تنظیم نا سرجزآتے ٹی فعال کڑد ادا کرینے۔ پاکستان تینا الس نا مفاد اٹی اسیجائی حکومت ہائے عملی وضع کننگ نا بابت آئی ٹی یوتون اواری اٹ کاریم کننگ نا خواہندار ئِ۔ اواومیت ظاہر کرے کہ آئی ٹی یو نا سیکرٹری جنرل نا دورہ پاکستان و آئی ٹی یو نا نیام اٹ کمکاری آ محیط ساڑی تعلقداری ئِ پین سوگوی ایتک۔ اوڈل انا پاکستان اٹی جوڑجاڑی و مفید قیام کن نیک است خواہی تا درشانی ئِ کرے۔
