اسلام آباد۔ 19جولائی (اے پی پی) صدر مملکت ممنون حسین پارینے کہ آپریشن ضرب عضب آن پاکستان اٹی امن و ایمنی نا حالیت آک گچین مسنو، پاکستان اٹی زرکاری نا بے پناہ وارخواہی ساڑی ارے ہرافتے آن ایلو ملک آتے فائدہ ہرفوئی مرے۔ اوداہیت ئِ ہالینڈ اٹی پاکستان نا پندار سفیر عفت عمران گردیزی تون ایوان صدر اٹی اوڑدہی نا وخت آ پارے۔ صدر مملکت ہالینڈ اٹی بطور سفیر تعیناتی آ عفت عمران گردیزی ئِ مبارکبادی تس۔ اودااومیت نا درشانی ئِ کرے کہ اونا دور اٹی پاکستان و ہالینڈ نا تعلقداریک پین سوگو مریرہ۔ صدر مملکت پارے کہ یورپی یونین نا تناظراٹی ہالینڈ تون پاکستان نا تعلقداریک بھاز اہم ئُ ۔ اوپارے کہ ایلو زمہ واری تے تون اونا اسہ اہم زمہ واری داہم ارے کہ ہموجاگہ نا خلقت آتے پاکستان اٹی زرکاری کن متوجہ کے۔ صدر مملکت پارے کہ ہالینڈ اٹی پاکستان نا اقتصادی لائخی تے تالان کننگ و پاکستان ئِ کاروبار دوست ملک انا وڑاٹ درستی راستی کرفنگے۔ صدر مملکت پارے کہ پاکستان اٹی داوخت ہالینڈ نا بھاز انگا کمپنیک کاریم کننگ ئُ۔ ننا بایدے کوشست مرے کہ ایلوکمپنیک پاکستان اٹی زیات آن زیات زرکاری کیر۔ صدر مملکت مستی پارے کہ پاکستا ن ئِ ہالینڈ نا کمپنی خاص کر کشت وکشار آ مبنی صنعتی بشخ اتون وابستہ کمپنی تیان فائدہ ہرفوئی مرے و توانائی، دیر انا بست و بند ، کشت وکشار و بنداوی ڈھانچہ نا شون نا بشخ آتے ٹی اونا لائخی تیان فائدہ ہرفوئی مرے۔ صدر مملکت پارے کہ پاکستان اٹی زرکاری نا مون آ دننگ کن تین پہ تینی رابطہ غاتے مون آ دروئی مرے۔ اوپارے کہ ہڑتوم آ ملک آتا نیام اٹ تعلیم و دودوربیدہ نا بشخ آتے ٹی کمک ئِ ودفنگ نا گرج ئِ۔ پندار سفیر ہالینڈ اٹی پاکستانی کمیونٹی نا شرحالی کن جوڑ کروک آ ڈٹ آتا بارواٹی صدر مملکت ئِ معلومدار کرے۔