ریلوے ءِ وفاقی وزیر محمد حنیف عباسی ءَ پاکستان ریلوے ءَ وی آئی پی کلچر ءِ سرجمی ءَ ھلاس کنگ ءِ جار جتگ، وزیر ءَ بگر داں آئی جی

اسلام آباد۔20جولائی  (اے پی پی): ریلوے ءِ وفاقی وزیر محمد حنیف عباسی ءَ پاکستان ریلوے ءِ تہ ءَ مزنیں تک ءَ وی آئی پی کلچر ءِ سرجمیں ھلاسی ءِ جار جتگ ءُ ریلوے ءِ وزیر ءِ بستار ءَ وت ءُ وتی مزنیں افسر آنی نیمگ ءَ چہ ھاسیں لاؤنج ءُ ریسٹ ہاؤس آنی وی آئی پی روم آنی کارمرد کنگ ءِ سر ءَ بندش جتگ۔ ہر شہری چہ اے عیش و آرام ءِ سفری ءُ رہائشی آسراتی ءَ چہ معقول کرایہ ءِ ادائیگی ءَ چہ فائدہ چست کنگ ءِ اہل بیت۔ راجی ھال رسانکی ادارگ ’’اے پی پی‘‘ ءَ گوں ھاسیں گپ ءُ تران ءَ ریلوے ءِ وفاقی وزیر محمد حنیف عباسی ءَ گوشت کہ ریلوے ءِ محکمہ ءَ را نوکیں رنگ ءَ جوڑ کنگ ءُ الس ءِ واھشت آنی رد ءَ جوڑ کنگ ءِ واستہ انقلابی گامگیج زورگ بوھگ ءَ انت۔ آئی ءَ گوشت کہ پاکستان ءِ راجدپتر ءَ اولی رند ءَ ریلوے ءِ تہ ءَ وی آئی پی کلچر سرجمی ءَ ھلاس کنگ بوتگ۔ وفاقی وزیر ءَ گوشت کہ ریلوے ءِ وزیر ءِ سیلون، چیئرمین ءِ سیلون، چیف ایگزیکٹو ءِ سیلون ءُ آئی جی ریلوے ءِ نیمگ ءَ کارمرد بوھوکیں سیلون ءَ ھوار وی وی آئی پی تحریک ءِ واستہ ریزرو بوتگیں درستیں سیلون آنی سر ءَ زوتیں رنگ ءَ بندش جنگ بوتگ۔ ماضی ءَ اے سیلون ایوک ءَ پہ خاصیں شخصیتانی سفری لوٹاں کارمرز بوتگ انت کہ ایشی ءَ چہ محکمہ ءِ سرا گیشیں بوجھے ایر بوتگ۔ محمد حنف عباسی ءَ اے گپ پدر کت کہ نوں سرجمیں ملک ءَ دستیابیں ریلوے ریسٹ ہاؤس آنی اے لگژری سیلون ءُ وی آئی پی روم پہ لس مھلوک ءَ ایر کنگ بوتگ انت۔ ہر عام شہری نوں یک مقررہ ءُ معقول کرایہ ءِ ادا کنگ ءَ پد وتی سفر ءُ رہائش ءِ ہاترا اے عیش و آرام ءِ آسراتی ءَ بک کنت۔ اے گامگیج ءِ مول ءُ مراد ایوک ءَ ریلوے ءِ مسافر آناں یک پیم ءَ جوانیں ءُ وشیں آسراتی ءِ پجارینگ نہ اِنت بلکیں ایشی ءِ وسیلگ ءَ ریلوے ءِ محکمہ ءِ واستہ گیشیں آمدنی ءِ وسیلگ پیداک کنگ اِنت۔ وفاقی وزیر ءَ گوشت کہ ریلوے راجی اثاثہ اِنت ایشی ءِ سرجمیں وسیلگ آنی اولی حق پاکستان ءِ عام الس ءِ اِنت۔