ناشرکاری ءِ ھلاپ ءَ بے مٹیں گامگیج برجاہ مان انت، بلوچستان سرکار ءَ فلاحی مزنیں منصوبگ بندات کتگ انت، سرفراز بگٹی

اسلام آباد۔19جولائی  (اے پی پی): بلوچستان ءِ سر وزیر سرفراز بگٹی ءَ ناشرکاری ءِ ھلاپ ءَ بے مٹیں کارروائی ءَ را برجاہ دارگ ءِ وتی جزم ءِ پدر کنگ ءَ گوشت کہ صوبائی حکومت راج ءِ وشھالی ءِ واستہ مزنیں گامگیج زورگ ءَ اِنت ایشی ءِ تہ ءَ 16ہزار استاد آنی بھرتی ءُ     فلٹریشن پلانٹس  ءِ  بن ھشت ایر   کنگ ھوار اِنت۔ یک شمبے ءِ روچ ءَ کونجی ٹی وی ءَ گوں تران کنان ءَ آئی ءَ گوشت کہ بلوچستان ءِ نزیک ءَ 900 یونین کونسل آنی تہ ءَ یک فلٹریشن پلانٹے ایر کنگ بیت تانکہ مہلوک ءَ را ساپ ءُ پاکیں آپ ءِ ورگ ءِ پجاری بہ بیت۔ بنجاھی وزیر ءَ امن ءُ ایمنی ءِ جاورھال ءِ ھوالگ ءَ گپ ءُ تران کنان ءَ گوشت کہ سیکورٹی فورسز ناشرکاریں عناصر ءِ ھلاپ ءَ جوانیں کارروائی کنگ ءَ انت ءُ برجاھیں آپریشن ءِ ساھت ءَ تاں انوگ ءَ 91 ناشرکار بیران بوتگ انت۔ آئی ءَ اے گپ ءِ سر ءَ زور پر دات کہ ناشرکاری ءِ ھلاپ ءَ جنگ ءَ ھچ وڑیں سوگند بوت نہ کنت پرچا کہ اے کار ملک ءِ امن ءُ ایمنی ءِ واستہ ناگزیر اَنت۔ واجہ سرفراز بگٹی ءَ یک جُستے ءِ پسو ءَ اے گپ رد کت کہ گچین بوتگیں راج ءِ نمائندگ وتی حلقہ آں چہ گار اَنت۔ آئی ءَ گوشت کہ اے تاثر راستی آنی سر ءَ بنیات نہ اِنت، الس ءِ نمائندہ مُدام وتی دمگ آنی تہ ءَ ساڑی اَنت ءُ الس ءِ جیڈھ آنی گیواری ءِ واستہ رابطہ ءَ اَنت۔