پاکستان ءُ کشمیر ءِ سیادی ءِ بنیات مشترکہ راجدپتر، روایت ءُ جغرافیہ ءِ سرا انت، محسن نقوی

اسلام آباد۔19جولائی  (اے پی پی): وفاقی تہی کارانی وزیر محسن نقوی ءَ پاکستان ءِ ھوار بوھگ ءِ روچ ءِ موہ ءَ جموں ءُ کشمیر ءِ الس آناں شگر ءُ منت درشان کنان ءَ کشمیری شھید آنی قربانی ءُ آجوئی ءِ تحریک ءِ سروکی ءِ ساڑات ءُ کشمیری ءِ حق ءِ واستہ پاکستان ءِ بے مٹیں کمک ءِ یک رندے پدا گوشت۔ یک شمبے ءِ روچ ءَ وتی ھاسیں کلوہ ءِ تہ ءَ وزیر تہی کار ءَ گوشت کہ کشمیری شھید ءُ ھریات سروک آں دہائی آنی تہ ءَ جہد ءُ کوشست ءُ قربانی ءِ وسیلگ ءَ آجوئی ءِ شمع روجگ ءَ داشتگ، ایشی ءِ واستہ سرجمیں راج آھاں سلامی دنت۔ آئی ءَ گوشت کہ 19جولائی 1947 ءِ قرارداد کشمیری الس ءِ اجتماعی واھشت آنی راستیں درشان ءُ آجوئی ءِ تحریک ءِ یک ھاسیں سنگ انت، ایشی ءِ تہ ءَ کشمیر ءِ الس ءِ پاکستان ءَ گوں ھوار بوھگ ءِ بے دروریں جزم ءِ ساھی انت۔ محسن نقوی ءَ گوشت کہ کشمیری راج ءَ پاکستان ءِ جوڑیشت ءَ چہ پیسر وتی باندات ءَ گوں پاکستان ءَ ھمگرنچ کنگ ءِ پیسلہ کتگ ات۔ آئی ءَ گوشت کہ پاکستان ءُ کشمیر ءِ سیادی مشترکہ راجدپتر، دود ءُ ربیدگ ءُ جغرافیہ ءِ سر ءَ انت۔ وزیر ءِ توکی کار ءَ گوشت کہ پاکستانی راج وتی کشمیری برات ءُ گھار آنی گوما شانک پہ شانک ءَ اوشتاتگ ءُ بھارتی ظلم ءُ زوراکی آنی پد ءَ کشمیری اُلس ءِ صبر، مھکمی ءُ دلیری ءَ را شگر ءُ منت ءَ پیش کنت۔ جموں ءُ کشمیر ءِ اُلس ءَ را وتی باندات ءِ پیسلہ کنگ ءِ حق دیگ بہ بیت۔ آئی ءَ گوشت کہ جنوبی ایشیا ءَ دیریں امن ءُ برجائی ءِ واستہ کشمیری الس ءِ واھشت آنی رد ءَ کشمیر ءِ جیڈھ ءِ پجائی ءُ پرامنیں گیواری المی اِنت۔ محسن نقوی ءَ اے جزم ءِ پدا زور دات کہ پاکستان کشمیری راج ءِ وت واجہی ءِ حق ءِ بے شرط ءُ اصولی حمایت ءَ برجاہ دار ایت۔