ریلوے پولیس ءِ وشحالی ءِ جیڑہ اولویت ءِ بنیاد ءَ گیش ءُ گیوار کنگ بیت، ریلوے ءِ وفاقی وزیر محمد حنیف عباسی

لاہور۔16جولائی  (اے پی پی): ریلوے ءِ وفاقی وزیر محمد حنیف عباسی ءَ گوشت کہ حکومت پاکستان ریلوے ءَ را میرٹ، شفافیت، نوکیں لائن آنی سر ءَ دیمروئی دیگ ءُ سیکورٹی سسٹم ءَ را گیش جوانیں جوڑ کنگ ءِ واستہ جزم اِنت وھدیکہ پاک ریلوے پولیس راجی اثاثہ، ریلوے ءِ مسافر آناں رکھینگ ءِ واستہ کلیدی کرد پیلو کنگ ءَ اِنت۔ آ پنچ شمبے ءِ روچ ءَ پاک ریلوے پولیس ءِ بھرتی بوتگیں مردمانی پاسنگ آؤٹ پریڈ ءَ گوں گشتانک دیگ ءَ ات۔ ریلوے ءِ وفاقی وزیر حنیف عباسی ءَ ملک ءِ سلاہ بندیں اُرد، کانود ءِ نفاذ ءِ ادارگ، شہید ءُ غازی آناں شگر ءُ منت گپت ءُ گوشت کہ آھانی قربانی آنی سبب ءَ ملک ءَ امن ءُ ایمنی برجم دارگ بیت۔ آئی ءَ گوشت کہ پاک ریلوے ایوک ءَ ٹرانسپورٹ ادارگ نہ انت بلکینگ ءَ راجی یکوئی ءُ اقتصادی دیمروئی ءِ علامت انت کہ آ ھمک روچ لاکھوں مسافر آناں سروسز پجاری کنگ ءَ انت ءُ مزنیں کساس ءَ مال برگ ءَ انت۔ وفاقی وزیر حنیف عباسی ءَ انسپکٹر جنرل پاکستان ریلوے پولیس ءِ سروکی ءَ فورس ءِ پیشہ وارانہ کارکردگی ءَ را ساڑات۔ ریلوے پولیس ءَ سرکاری ھزمت، مسافر آنی آسراتی، ریلوے ءِ جائیداد ءِ رکھینگ، ءُ بے ٹکٹ ءِ سفر ءِ دیم ءَ دارگ ءِ رد ءَ مزنیں سوبمندی یے رستگ۔ آئی ءَ گوشت کہ گوستگیں بھرتی ءِ عمل سرجمی ءَ میرٹ ءِ سر ءَ کنگ بوتگ ایشی ءِ تہ ءَ ھچ وڑیں سیاسی سپارش ءُ دباؤ برداشت کنگ نہ بوتگ۔ آئی ءَ پاس آؤٹ بھرتی ءُ آھانی مات ءُ پت آناں مبارک بات دات ءُ گوشت کہ ورنائیں کارندہ وتی پیشہ وارانہ زند ءِ تہ ءَ ایمانداری، نظم ءُ ضبط، انصاف ءُ سرکاری ھزمت ءِ شعار جوڑ بہ کن اَنت، مسافر آنی گوما احسان ءِ رنگ ءَ پیش بہ دار اَنت، کانود ءِ سر ءَ عمل کنگ ءَ را بے تبعیض ءَ را دل یکیمی بہ کن اَنت ءُ وتی زمہ واری ءَ را سرجمیں ذمہ واری ءِ گوما پیلو بہ کن اَنت۔ وفاقی وزیر ءَ گوشت کہ حکومت ریلوے ءِ کارندہ آنی واستہ تربیتی آسراتی، انتظامی ڈھانچہ ءُ رہائشی کالونی آناں گہتر کنگ ءِ سر ءَ کار کنگ ءَ انت۔ آئی ءَ دل یکیمی دات کہ ریلوے پولیس ءِ تربیت ءُ وشھالی ءِ ھوالگ ءَ درستیں جائزیں جیڈھ اولویت ءِ بنیاد ءَ گیش ءُ گیوار کنگ بنت پرچا کہ مسافر ءُ ریلوے اثاثہ آنی رکھینگ ءَ اے فورس ءِ کرد ناگزیر انت۔ آئی ءَ ناشرکاری ءِ ھلاپ ءَ جنگ ءَ وتی سر ندر کرتگیں شہید آناں ستا کرتگ ئُُ گوشت کہ پاک ریلوے پولیس ءَ ھوار سیکورٹی ادارگ آنی ھزاراں کارندہ آں ملک ءِ امن ءِ واستہ قربانی داتگ۔ بلوچستان ءُ خیبر پختونخوا ءَ انوگیں ناشرکاری ءِ واکیہ آنی مذمت کنان ءَ آئی ءَ گوشت کہ پاکستان ناشرکاری ءِ سرجمیں ھلاسی ءُ راجی یکوئی ءِ دیمروئی ءِ واستہ پاکستان ءِ جزمیگ اِنت۔ وفاقی وزیر ءَ گوشت کہ گوستگیں مالی سال ءِ ساھت ءَ پاک ریلوے ءَ 115ارب کلدار ءِ ریکارڈ آمدنی کتگ ایشی ءَ چہ پیسر 88ارب کلدار بوتگ۔ آئی ءَ گوشت کہ ریلوے ءِ انفراسٹرکچر ءَ را نوک جوڑ کنگ، آپریشنل کوتاہی آناں ھلاس کنگ ءُ ادارگ ءَ را گیش کارآمد جوڑ کنگ ءِ واستہ اصلاحات ءِ عمل جاری اِنت، وھدیکہ درستیں پیسلہ آنی تہ ءَ میرٹ ءُ شفافیت ءَ را بنیاتی رھبند جوڑ کنگ بیت۔ آئی ءَ درستیں پاس آؤٹ بھرتی ءُ آوانی ھاندان ءَ را مبارک بات دات ءُ امیت سہرا کت کہ نوکیں تربیت یافتہ فورس پیشہ وارانہ، یکوئی ءُ  مہر  ءِ گوما راج ءِ ھزمت ءَ پاکستان ءَ را مھکم ءُ ایمن جوڑ کنگ ءَ وتی سرجمیں کرد ءَ پیلو کنت۔