پاکستان ءُ پرتگال ءِ نیام ءَ دو نیمگی سیاسی مشاورت ءِ چارمی دور، کمک ءِ دیمروئی ءِ بابت ءَ تپاک

اسلام آباد۔16جولائی  (اے پی پی): پاکستان ءُ پرتگال ءِ نیام ءَ دو نیمگی سیاسی مشاورت ءِ چارمی دور اسلام آباد ءَ بوت۔ دری کارانی کارگس ءِ جارکش ءِ نیمگ ءَ جاڑی بوتگیں بیان ءِ رد ءَ پاکستانی ڈل ءِ سروکی ءَ وزارت ءِ دری کارانی ایڈیشنل سیکرٹری (یورپ) سفیر عائشہ علی ءَ کتگ وھدیکہ پرتگالی ڈل ءِ سروکی ءَ سفیر ہیلینا مالکاٹا  ءِ سروکی ءَ وزارت ءِ دری کارانی پالیسی ءِ ڈائریکٹر جنرل سفیر بوتگ۔ دوئیں نیمگ ءَ دو نیمگی سیادی ءِ توامیں تک ءُ پھنات آنی سر ءَ چار ءُ تپاسی کنگ بوت ءُ سیاسی سیادی ءَ را گیش مھکم کنگ ءِ ھوار تجارت ءُ سرمایہ کاری، لیبر موبلٹی، کشت ءُ کشاری، قابل تجدید توانائی، انفارمیشن ٹیکنالوجی، وانگ ءُ زانگ، سیل ءُ سواد، دود ءُ ربیدگ ءُ لس سیادی ءِ پڑ آنی تہ ءَ کمک ءِ دیمروئی ءِ راہ آنی سر ءَ تران کت۔ ایشی ءَ ابید کاروباری رابطہ، بندرگاہ ءِ رابطہ، زیتون ءِ کاشت ءُ پروسیسنگ ءِ پڑ ءَ کمک ءِ موہ آنی سر ءَ ھم گپ ءُ تران کنگ بوتگ۔ دوئیں نیمگ ءَ دمگی ءُ میاں اوستمانی دیمروئی آنی بابت ءَ ھم ھیال ءُ لیکہ ءِ درشان کنگ بوتگ ءُ کثیر نیمگی فورم آنی تہ ءَ وت مہ وتی کمک ءُ ھمگرنچی ءِ سر ءَ دل یکیمی ءِ درشان کنگ بوتگ۔ تر ءُ تاب ءِ ساھت ءَ پرتگالی ڈل ءَ دری کارانی سیکرٹری ءَ گوں ھم گند ءُ نند کتگ، ایشی ءِ تہ ءَ دو نیمگی سیادی ءُ وت مہ وتی دلچسپی ءِ دمگی ءُ میاں اوستمانی جیڈھ آنی سر ءَ گپ ءُ تران کنگ بوتگ۔ اے راؤنڈ ءِ مشاورت یک وشیں ءُ تعمیری ماحول ءِ تہا برجم دارگ بوتگ۔ دوئیں نیمگاں باقاعدہ سیاسی گپ ءُ تران ءِ برجاہ دارگ ءُ وت مہ وتی فائدہ مندیں کمک ءِ گیش وسعت ءِ واستہ وتی جزم ءِ پدر کنگ ءَ انت۔ اے گپ ءِ سر ءَ ھم تپاک کنگ بوت کہ دو نیمگی سیاسی شور ءُ سلاھ آنی آیوکیں دور لزبن ءَ دوئیں نیمگ ءَ تپاک کتگیں روچ آنی سر ءَ برجم دارگ بیت۔