وفاقی وزیر ڈاکٹر مصدق ملک ءَ انڈس بلائنڈ ڈولفن  ءِ رکھینگ ءِ ھاتر ءَ اجتماعی گامگیج آنی سر ءَ زور

اسلام آباد۔14جولائی  (اے پی پی): موسمیاتی بدلی ءُ چاگردی ہم آہنگی ءِ وفاقی وزیر ڈاکٹر مصدق ملک ءَ انڈس بلائنڈ ڈولفن  ءِ رکھینگ ءِ ھاتر ءَ یکجائی گامگیج آنی سر ءَ زور پر دات ءُ گوشت کہ وفاقی ءُ صوبائی حکومت ءَ یکجائی ءَ چہ گار بوھگ ءِ ھترہ ءَ کپتگیں سندھ ڈالفن ءَ را رکینتگ۔ سندھ ڈالفن بازیں تہذیباں چہ کوھن تر انت۔ جدید ڈالفن ریسکیو ایمبولینس ءِ وسیلگ ءَ 200 کلومیٹر ءِ دمگ ءَ سروسز رس ایت۔ انوگ ءَ تاں 220 سندھ ڈالفن ءِ پھناتگیں جہاز ءِ سوبمندی ءَ گوں رکّینگ بوتگ۔ چاگردی تباہی ءِ چہ بچگ ءِ ھاترا اجتماعی گامگیج لوٹ اَنت۔ ماحولیاتی تباہی ءِ سبب ءَ آبی ءُ جنگلی زند ءِ سرا ہم منفی اثر کپگ ءَ انت۔ آئی ءَ اے جیڈھ آنی درشان سئے شمبے ءِ روچ ءَ اسلام آباد ءَ ورلڈ وائلڈ لائف فنڈ ءِ نیمگ ءَ برجم داشتگیں سندھ ڈالفن ایمبولینس ءِ بنگیج ءِ مراگش ءَ گوں تران کنان ءَ کت۔ وفاقی وزیر ءَ گوشت کہ سندھ بلائنڈ ڈالفن سندھ دریا ءِ کوھن تریں جانور آنی بھر اِنت کہ سندھ وادی ءِ کوھنیں تہذیب آناں چہ پیسر ءَ چہ دریا ءِ تہ ءَ ھست اِنت۔ آئی ءَ گوشت کہ اے ڈالفن ھچ وڑیں نادراھی یا حادثہ ءِ سبب ءَ کور نہ بوتگ، بلکیں، اے وتی راہ ءَ شوھاز کنت ءُ قدرتی ارتقائی عمل ءِ چیر دستی ءَ ایکولوکیشن (آواز ءِ لہر) ءِ وسیلگ ءَ شکار کنت، ایشی ءَ چہ آ دریائے سندھ ءِ چاگرد ءَ گوں سرجم ءَ ھمگرنچ بیت۔ وفاقی وزیر ءَ گوشت کہ سندھ کوریں ڈالفن ایوک ءَ نادریں آبی جانور نہ انت بلکیں دریائے سندھ ءِ دود ءُ ربیدگی ورثہ، ایشی ءِ ماحولیاتی نظام ءُ سندھ وادی ءِ چیدگ  انت۔ آئی ءَ گوشت کہ اے ڈولفن وتی توار ءِ گوش دارگ ءَ وتی سفر ءَ برجاہ دار ایت، وھدیکہ مرچی اصل جست ایش انت کہ آیا انسان ایشی ءِ توار ءِ گوشدارگ ءَ ساڑی انت؟ ڈاکٹر مصدق ملک ءَ گشتگ کہ لہتیں دہائی پیسر 1970 ءِ نزیک ءَ سندھ کوریں ڈالفن ءِ کساس کم بوتگ ات ءُ نزیک ءَ دوازدھیں سد بوتگ ات ءُ ماہرین اے نسل ءِ گار بوہگ ءِ بابت ءَ جیڑہ درشان کنگ ءَ اتنت۔ بلے وفاقی حکومت، سندھ حکومت، پنجاب حکومت، ورلڈ وائلڈ لائف فنڈ ءُ دگہ شریکیں گلانی یکجائی کوشست ءَ اے نادریں نسل ءِ رکھینگ ءِ ھاتر ءَ موثر گامگیج چست کنگ بوتگ۔ آئی ءَ گوشت کہ انوگ ءَ تاں دریا ءَ چہ 220بیریں سندھ کور ڈالفن سوبمندیں رنگ ءَ رکینتگ کہ اے سیادی داروکیں ادارگ، ماہرین ءُ دمگی آبادی ءِ برجاھیں کوشست آنی آسر اِنت۔ چین ءِ دریائے یانگسی ءِ بائیجی ڈالفن ءِ حوالہ ءَ آئی ءَ گوشت کہ یک نسل ءِ رکّینگ نہ بوتگ، وھدیکہ سندھ کوریں ڈالفن ءِ رکھینگ ءِ ھاترا اجتماعی جزم ءُ وھد ءِ سر ءَ کٹائی ءِ آسر اِنت۔ وفاقی وزیر ءَ گوشت کہ موسمیاتی بدلی، گرین ہاؤس گیس ءِ کشگ، درجہ حرارت ءِ تہ ءَ گیشی، گلیشیر آنی پگھل بوھگ ءُ تباہ کنوکیں سیلاب آناں قسمت ءِ رنگ ءَ رد کنگ نہ بیت، بلکیں اے انسانی کار ءُ کرد ءُ رویہ ءِ آسر اَنت۔ آئی ءَ گوشت کہ گوستگیں سال آنی تہ ءَ سیلاب ءَ چہ 40 ملین ءَ چہ گیش مردم آماچ بوتگ اَنت، 6 ہزار ءَ چہ گیش مردم بیران بوتگ اَنت، وھدیکہ 20 ہزار ءَ چہ گیش مردم ٹپیگ بوتگ اَنت، ایشی ءَ چہ چاگرد ءِ رکھینگ ءِ ارزشت ءَ را پدر کنگ بیت۔ ڈاکٹر مصدق ملک ءَ گوشت کہ حکومت دریائے سندھ ءَ را ’’مھروانیں سندھ‘‘ ءُ وادی سندھ ءَ را یک زندگیں تہذیب ءِ رنگ ءَ رکھینگ ءِ واستہ جزمیگ انت۔ آئی ءَ گوشت کہ نوکیں ڈالفن ریسکیو ایمبولینس ءَ چہ نزیک ءَ 200 کلومیٹر ءِ دمگ ءَ سروسز رس ایت ءُ سندھ کوریں ڈالفن ءِ زندمان ءِ جاہ ءَ را جوانیں رنگ ءَ ھوار کنگ بیت، وھدیکہ دریا ءِ کش ءَ نندوکیں 1500 ءَ چہ گیش ماہی گیر ءُ دمگی ھاندان ھم اے تحفظ ءِ مشن ءَ ھوار بنت۔ آئی ءَ گوشت کہ اے ریسکیو ایمبولینس قدرتی ورثہ ءِ رکھینگ ءِ راجی جزم ءِ چیدگ  اِنت ءُ آیوکیں وھد ءَ گیش اے وڑیں عملی منصوبگ دیم ءَ آرگ بنت تانکہ دگنیا ءَ را اے پیغام دیگ بہ بیت کہ پاکستان وتی قدرتی ورثہ، دریائے سندھ، بائیو ڈائیورسٹی ءُ چاگرد ءِ رکھینگ ءِ واستہ سنجیدہ ءُ جزم اِنت۔ آئی ءَ چہ راج ءَ لوٹ کت کہ آ طبیعت، چاگرد ءُ وتی دود ءُ ربیدگ ءِ رکھینگ ءِ واستہ اجتماعی ذمہ واری ءِ درشان ءَ بہ کن انت۔