وزیر مملکت ڈاکٹر وجیہہ قمر NUML ءِ مراگش ءَ بہر زوری

اسلام آباد۔14جولائی  (اے پی پی): وفاقی وانگ ءُ زانگ ءُ پیشہ وارانہ تربیت ءِ وزیر ءِ مملکت ڈاکٹر وجیہہ قمر ءَ نیشنل یونیورسٹی آف ماڈرن لینگویجز (NUML) ءَ برجم داشتگیں مراگش ءَ بہر زرتگ، ایشی ءِ تہا مسلم ورلڈ لیگ ءِ سیکرٹری جنرل عالی  شیخ ڈاکٹر محمد بن عبدالکریم العیسیٰ  ءَ را شرپ داتگ۔ بین المذاہب یکوئی ، انساپ دوستی، پرامن  کلوہ  ءُ اسلام ءِ حقیقی امن دوستیں پیغام ءِ دیمروئی ءِ ھاتر ءَ استثنائی عالمی خدمات ءِ ھاتر ءَ دیم ءَ آرگ بوتگ۔ مراگش ءَ پاکستان ءَ سعودی عرب ءِ سفیر نواف بن سعید المالکی، سرکاری مزنیں کارندہ، سفارتکار، وانگ ءُ زانگ ءِ کارندہ ءُ زند ءِ جتا جتائیں تک ءُ پھنات ءِ نامداریں مردم آنی بھر زوری بوتگ۔ اے موہ ءِ سر ءَ تران کنان ءَ ڈاکٹر وجیہہ قمر ءَ جہانی تک ءَ جتا جتائیں مذہب ءُ دود ءُ ربیدگ آنی نیام ءَ امن، برداشت، گپ ءُ تران ءُ وت مہ وتی شرپ ءِ دیمروئی ءِ واستہ شیخ ڈاکٹر محمد بن عبدالکریم العیسیٰ ءِ ازمت آناں شرپ دات۔ آئی ءَ گوشت کہ ڈاکٹر العیسیٰ ءَ وتی زندمان وانگ ءُ زانگ، انصاف، انساپ دوستی، انسانی شرپ ءُ بین المذاہب یکوئی ءِ دیمروئی ءِ واستہ ندر کتگ، ایشی ءِ سبب ءَ آ سرجمیں دگنیا ءَ امن ءُ انساپ دوستی ءِ معتبریں توار ءِ رنگ ءَ منگ بیت۔ وزیر مملکت ءَ گوشت کہ نیشنل یونیورسٹی آف ماڈرن لینگوئجز ءِ نیمگ ءَ چہ اے شرپ یک انچیں جھان ءِ سروک ءِ یات اِنت کہ آئی ءَ زانت، گپ ءُ تران ءُ انسانیت ءِ ھزمت ءِ وسیلگ ءَ جھان ءَ جوانیں بدلی آرگ ءِ تہ ءَ مزنیں کرد پیلو کتگ۔ ڈاکٹر وجہیہ  قمر ءَ اے گپ ءِ سر ءَ زور پر دات کہ وانگ ءُ زانگ رواداری ، شمولیت ءُ چاگردی ھمگرنچی ءِ دیمروئی ءِ مستریں وسیلہ اِنت۔ آئی ءَ گوشت کہ وانگ ءُ زانگ ءِ ادارگ آنی ذمہ واری اِنت کہ آ نوکیں نسل ءِ تہ ءَ انسانیت ءِ شرپ، تنقیدی سوچ، ذمہ واریں شہری ءُ امن ءُ ایمنی ءِ قدر آناں دیم ءَ برگ ءَ انت تانکہ جوانیں ءُ پائیداریں چاگرد جوڑ کنگ بہ بیت۔ پاکستان ءُ سعودی عرب ءِ نیام ءَ دیریں براتیں سیادی ءِ ھوالگ ءَ آئی ءَ گوشت کہ وانگ ءُ زانگ، دود ءُ ربیدگ، انسانی وسائل ءِ دیمروئی ءُ جتا جتائیں شوبگ آنی تہ ءَ وت مہ وتی کمک ءِ وسیلگ ءَ دوئیں ملک آنی نیام ءَ سیادی مدام مھکم بوھگ ءَ انت۔ آئی ءَ اے امیت سہرا کت کہ آیوکیں وھد ءَ ھم دوئیں براتیں ملک آنی نیام ءَ وانگ ءُ زانگی ءُ زانشتی کمک ءُ مردم آں گوں سیادی ءِ تہ ءَ گیشی برجاہ بیت۔ وزیر مملکت ءَ ڈاکٹر محمد بن عبدالکریم العیسیٰ ءَ را شرپی ڈاکٹریٹ ءِ ڈگری ءِ رسگ ءِ سر ءَ مبارک بات دات ءُ گوشت کہ اے شرپ آئی ءِ ذاتی کامیابی آنی شناخت ءِ ھوار مسلم امت ءِ یکوئی، میاں اوستمانی گپ ءُ تران ءُ جھان ءِ امن ءِ دیمروئی ءِ واستہ آئی ءِ بے مٹیں ھزمت آنی شناخت اِنت۔ مراگش ءَ گوں تران کنان ءَ شیخ ڈاکٹر محمد بن عبدالکریم العیسیٰ ءَ اے شرپ ءِ سر ءَ نیشنل یونیورسٹی آف ماڈرن لینگوئجز ءِ منت گپت ءُ گوشت کہ اے شرپ آئی ءِ واستہ پھر ءِ وسیلگ اِنت ءُ زمہ واری ءِ احساس ھم پیداک کنت۔ آئی ءَ جھان ءُ دمگی امن ءِ واستہ پاکستان ءِ سروکی ءِ کوشست آناں ساڑات ءُ مسلم ورلڈ لیگ ءِ انساپ دوستی، بین مذاہب یکوئی ءُ میاں اوستمانی کمک ءِ دیمروئی ءِ واستہ وتی کوشست آناں برجاہ دارگ ءِ جزم ءِ سر ءَ پدا زور دات۔ مراگش ءِ گڈ ءَ شریکیں مردماں وانگ ءُ زانگ، دود ءُ ربیدگ ءِ گپ ءُ تران ءُ جھان ءِ امن ءُ ایمنی ءِ دیمروئی ءِ واستہ یکجائی کوشست آناں گیش مھکم کنگ ءِ وتی جزم ءِ پدر کنگ کت۔