پاکستان ءِ میزبانی ءَ اسلامی کمک ءِ گل ءِ درستیں 57 باسکیں ملک آنی ڈل او آئی سی ءِ زالبول آنی وزارتی کانفرنس ءَ بھر زور اَنت، اعظم نذیر تارڑ

اسلام آباد۔12جولائی  (اے پی پی): کانود ءُ انصاف ءِ وفاقی وزیر اعظم نذیر تارڑ ءَ گوشت کہ پاکستان ءَ اسلامی کمک ءِ گل ءِ زالبول آنی 9می وزارتی کانفرنس ءِ میزبانی کنگ ءَ انت۔ اے دو روچی کانفرنس ءَ سرجمیں 57 باسکیں ملک آنی ڈل بھر زوری کن اَنت تانکہ سرجمیں مسلمانیں دگنیا ءَ زالبول آناں بااختیار جوڑ کنگ بہ بیت۔ کانفرنس ئِ گڈ سر ئَ اسلام آباد ئِ جار جاڑی کنگ بیت۔ یک شمبے ءِ روچ ءَ صبا صادق ءُ واجہہ قمر ءِ گوما نیوز کانفرنس ءَ گوں گشتانک دیان ءَ وفاقی وزیر کانود ءُ انصاف اعظم نذیر تارڑ ءَ گوشت کہ پاکستان اے وزارتی کانفرنس ءِ میزبانی ءَ چہ وش اِنت، ایشی ءِ سبب ءَ پاکستان آیوکیں دو سال آنی واستہ مصر ءَ چہ او آئی سی وومن ءِ چیئرمین شپ ءِ ذمہ واری ءَ زوریت۔ اے پریس کانفرنس ءَ پارلیمنٹ ءِ باسک واجہہ قمر ءُ صبا صادق ہم گون اتنت۔ اعظم نذیر تارڑ ءَ گوشت کہ بنداتی روچ ءَ تکنیکی تک ءِ دیوان برجم دارگ بوھگ ءَ انت، وھدیکہ ھاسیں وزارتی دیوان دو شمبے ءِ روچ ءَ باسکیں ملک آنی وزیر ءُ نگدکار آنی بھر زوری ءَ گوں برجم دارگ بیت۔ آئی ءَ گوشت کہ مزن وزیر محمد شہباز شریف کانفرنس ءِ باقاعدہ بنگیج ءَ کنت، اے موہ ءِ سر ءَ پاکستان زالبول آنی ھوالگ ءَ او آئی سی ءِ وزارتی کانفرنس ءِ سروکی ءَ وتی دست ءَ زوریت، ایشی ءِ واستہ مئے زالبول ءُ پاکستان تیار اَنت ءُ اے ذمہ واری ءَ را جوانیں رنگ ءَ پیلو کنگ ءِ کوشست ءَ کن اَنت۔ آئی ءَ گوشت کہ مزنیں کساس ءَ درملکی ڈل اسلام آباد ءَ سر بوتگ انت۔ وفاقی وزیر ءَ گوشت کہ اے سال ءِ کانفرنس ءِ مول ءُ مراد چاگرد ءِ تہ ءَ زالبول آنی کرد ءَ را گیش مھکم کنگ ءُ عملی پیشرفت ءِ سر ءَ کار ءِ تجویز تیار کنگ ءُ او آئی سی ءِ باسکیں ملک آنی تہ ءَ آھانی دیمروئی ءَ را گیش کنگ ءِ واستہ عملی گامگیج آناں پجارینگ اِنت۔ زالبول آنی چاگردی، اقتصادی ءُ سیاسی بااختیار جوڑ کنگ، چیلنج ءُ آھانی گیواری ءِ بنگپ ءِ سر ءَ برجم دارگ بوتگیں اے دیوان ءِ تہ ءَ زالبول آناں دیم ءَ اتکگیں مزنیں چیلنج آنی سر ءَ چار ءُ تپاسی کنگ بیت۔ باسکیں ملک اے بابت ءَ وتی پیشرفت ءِ بابت ءَ سرپد کن اَنت ءُ زند ءِ درستیں پڑ آنی تہ ءَ وتی بھر زوری ءَ را مھکم کنگ ءِ واستہ آیوکیں روڈ میپ تیار کنگ بیت۔ آئی ءَ گوشت کہ باسکیں ملک وتی وتی لیکہ آنی رد ءَ پیش کن اَنت۔ کانفرنس ”اسلام آباد ءِ اعلامیہ“ ءِ منظوری ءَ گوں آسر بیتگ کہ ایشی ءِ تہ ءَ زالبول آنی ھک ءُ موہ آناں دیم ءَ برگ ءِ واستہ او آئی سی ءِ باسکیں ملک آنی اجتماعی جزم ءِ درشان کنگ بیت۔ آئی ءَ گوشت کہ پاکستان اے دیوان ءَ را صنفی برابری ءِ دیمروئی ءُ یک ھواریں چاگرد ءِ جوڑ کنگ ءِ واستہ وتی گامگیج آناں دگنیا ءِ دیم ءَ پیش کنگ ءِ واستہ کارمرد کنت۔ کانفرنس ءَ وفاقی کابینہ ءِ بازیں باسک بہر زور اَنت وھدیکہ پنجاب ءِ سر وزیر مریم نواز شریف ءُ وزیر اھوالکاری ءُ ٹیلی کمیونیکیشن شیزا فاطمہ خواجہ ھم کانفرنس ءَ گشتانک دنت۔ وفاقی وزیر ءَ اے پروگرام ءِ سوبمندیں برجائی ءِ بندوبست ءِ تہ ءَ مزنیں پارلیمنٹرین واجہ قمر ءُ صبا صادق ءِ منت گپت۔ نائب مزن وزیر اسحاق ڈار ءِ سروکی ءَ درئی کارانی کارگس مہمان آنی میزبانی ءَ کنگ ءَ اِنت وھدیکہ وفاقی وزارت ءِ اھوال ءُ شنگکاری ھم سروکی کنگ ءَ اِنت۔ اے پاکستان ءِ واستہ مزنیں شرفے انت۔ ھمے کانفرنس ءَ پاکستان ءَ زالبول آنی واستہ یک شمولیت مندیں چاگرد ءِ جوڑ کنگ ءِ واستہ چست بوھوکیں گامگیج آنی بابت ءَ ھم سرپدی دیگ بیت۔ آئی ئَ گوشت کہ اے رنگیں میاں اوستمانی کانفرنس ئِ میزبانی راجی شان ئِ گپ اِنت۔ ما اللہ پاک ءِ شگر ءُ منت وار ایں کہ اے اولی رند انت کہ پاکستان ءَ را میزبانی ءِ کرد دیگ بوتگ ۔ ما اے زمہ واری ءَ جوانیں رنگ ءَ پیلو کنگ ءِ کوشست ءَ کنیں ءُ کانفرنس ءِ کوریج کنگ ءِ ھاتر ءَ دمگی ءُ میان استمانی رسانکدر ءِ ھاتر ءَ سرجمیں بندوبست کنگ بوتگ۔