اسلام آباد۔ 19جولائی (اے پی پی) وزیراعظم نا خصوصی کمکار خارجہ امور طارق فاطمی پارینے کہ پاکستان انڈونیشیاءتون تینا تعلقداری تے بے کچ اہمیت ایتک و انسداد دہشت گردی تون اوار کیہی بشخ آتے ٹی ہڑتوم آ کنڈآتا تعلقداری تے پین سوگو کننگ نا خواہندار ئِ ۔ داہیت ئِ او پاکستان اٹی تعینات انڈونیشیانا پوسکنا سفیر ایوان سویدھی عماری تون ہیت وگپ کرسا پارے، ہراسے شنبے آ اوڑتون اونا دفترخارجہ ٹی اوڑدہی کرے۔ دفترخارجہ نا ترجمان نا رداٹ طارق فاطمی دہشت گردی و دہشت گردنیٹ ورک نا چٹفنگ نا برخلاف انڈونیشین حکومت نا کوشست آتا ستائِ کرے و پارے کہ پاکستان و انڈونیشیا نا نیام اٹ انسداد دہشت گردی ٹی کمکاری ئِ ودفنگ نا گرج ئِ۔ طارق فاطمی پارے کہ پاکستان آسیان ملک آتون کمکاری آ مبنی تعلقداری تے کن پرعزم ئِ۔ اوانڈونیشیانا پوسکنا سفیر ئِ حکومت پاکستان نا کنڈآن پورو کمک تننگ نا یخین دہانی کرفے۔
