وفاقی وزیر خزانہ محمد اورنگزیب ءَ رائٹرز ءَ گوں تران کنان ءَ گشتگ کہ پاکستان جنگ ءِ آسر بوھگ ءَ پد 2027 ءَ تاں وتی اقتصادی دیمروئی ءِ پیش گوئی ءَ گہتر کنت بلے سپلائی چین ءِ وتی جاہ ءَ واتر بوھگ ءَ لہتیں وھد لگ ایت،

اسلام آباد۔16جون  (اے پی پی): وفاقی وزیر خزانہ ءُ آمدنی محمد اورنگزیب ءَ گشتگ کہ پاکستان جنگ ءِ آسر ءَ پد 2027 ءَ تاں وتی اقتصادی دیمروئی ءِ پیش گوئی ءَ را گہتر کت کنت بلے بجٹ ءِ تہا ترمیم کنگ انگت ءَ زوت انت۔ اے گپ وزیر ءِ ھزانگ ءَ سئے شمبے ءِ روچ ءَ برطانیہ ءِ ھال رسانکی ادارگ رائٹرز ءَ گوں تران کنان ءَ گوشت اَنت۔ محمد اورنگزیب ءَ گوشت کہ جنگ ءِ وھد ءَ توانائی ءِ بنیاتی ڈھانچگ ءَ را بوتگیں تاوان ءِ سبب ءَ سپلائی چین ءِ وتی جاہ ءَ واتر بوھگ ءَ وھد درکار بیت کہ ایشی ءَ چہ افراط زر ءِ شرح ءَ را پدا دو ہندسہ ءَ سر کتگ۔ وزیر خزانہ ءَ گوشت کہ ما اے جائزہ ءِ سر ءَ ایں کہ اگاں اے جیڈھ برجاہ بہ بیت گڈا بالواسطہ ءُ دومی درجہ ءِ اثرات ءَ را چوں دیم ءَ برگ بہ بیت، توانائی ءِ بنیاتی ڈھانچہ ءَ را تاوان رستگ، پمیشکا سپلائی چین ءِ وتی جاہ ءَ واتر بوھگ ءَ لہتیں وھد لگ ایت۔ وزیر خزانہ ءَ گوشت کہ آیوکیں سال ءِ واستہ اقتصادی پیش گوئی آنی تہ ءَ گہتری ءِ گمان گندگ ءَ کیت بلے اے وھد ءَ بجٹ ءِ تہ ءَ ترمیم کنگ انگت ءَ زوت اِنت۔ آئی ءَ گوشت کہ پاکستان مالی سال 2027 ءِ تہ ءَ درملکی وام آنی سرجمیں حجم ءَ را گیش کنگ ءَ ابید وتی کریڈیٹر پروفائل ءَ را بدل کنگ ءِ واستہ تجارتی وام آناں کارمرد کنت، ما چارگ لوٹ ایں کہ آیا لھتیں دو نیمگی وام آناں تجارتی وسیلگ آنی تہ ءَ چہ دست کپتگیں فنانسنگ ءِ بدل ءَ بدل کنگ بوت کنت، مئے سرجمیں ڈیب ءِ حجم ءَ را گیش کنگ ءِ ھچ وڑیں ارادہ نیست۔ وزیر ءِ ھزانگ ءَ گوشت کہ پاکستان ءَ گوستگیں ماہ ءَ امارات ءَ چہ 3.4ارب ڈالر ءِ دو نیمگی ڈپازٹ پدا داتگ ات، بلے اماراتی کمرشل بینک آنی نیمگ ءَ چہ مالی کمک ھم رستگ ات، ایشی ءَ چہ کریڈیٹر آنی نوکیں ڈھانچہ ءِ درشان انت کہ حکومت ایشی ءَ را باقاعدہ کنگ لوٹ ایت۔ آئی ءَ گوشت کہ حکومت ءِ ترندیں اولویت دفاعی ھرچ ءُ درچ ءُ وسیلگ آنی جوانیں رنگ ءَ بھر ءُ بانگ اِنت، چیاکہ اے وھد ءَ پاکستان ءِ دوئیں سیم سر فعال رنگ ءِ سیکورٹی چیلنج آنی دیم ءَ اَنت۔ ڈیجیٹل اثاثہ آنی کریپٹو کرنسی، ٹوکنائزیشن ءُ ایکسچینج ٹریڈڈ فنڈز ءِ ھوالگ ءَ وزیر ءِ ھزانگ ءَ گوشت کہ حکومت ٹیکس نیٹ ءِ چیر ءَ آرگ ءَ پیسر اے شوبگ آناں جوانیں ریگولیشن ءُ ریگولیٹری فریم ورک ءِ دیم ءَ کاریت۔ وھدے کہ اے شعبہ رسمی ءُ منظم بیت گڑا ایشی ءَ چہ پیداکیں آمدنی ءِ سرا ٹیکس جنگ بوت کنت، لہتیں پڑ ءَ مارا اے شعبہ ءَ ٹیکس ءِ نظام ءِ دائرہ کار ءِ تہا آرگ لوٹیت بلے اے وھد ءَ اے کار ءِ ھاتر ءَ ھچ وڑیں ھک نیست۔