وفاقی وزیر داخلہ منصورہ ءِ تر ءُ تاب ءَ کنت، جماعت اسلامی ءِ سروک ءَ گوں گند ءُ نند کنت، دمگی ءُ جھان ءِ جیڑھانی سر ءَ گپ ءُ تران

لاہور۔16جون  (اے پی پی): وفاقی داخلہ ءِ وزیر محسن نقوی ءَ جماعت اسلامی ءِ بنجاہی کارگس منصورہ ءِ تر ءُ تاب کتگ ءُ اودا آئی ءَ جماعت اسلامی ءِ سروک حافظ نعیم الرحمان ءِ گوما ھاسیں گند ءُ نند کتگ۔ گند ءُ نند ءِ ساھت ءَ ملک ءِ سرجمیں سیاسی، اقتصادی ءُ ایمنی ءِ جاور ھال آنی سر ءَ ھم ھاسیں دمگی ءُ جھان ءِ جیڈھ آنی سر ءَ گپ ءُ تران کنگ بوت۔ وزارت داخلہ ءِ جارکش ءِ رد ءَ گند ءُ نند ءِ وھد ءَ ایران ءُ امریکا ءِ نیام ءَ مفاہمت ءَ پد دمگ ءِ بدل بوھوکیں جاورھالانی سر ءَ ھاسیں گپ ءُ تران کنگ بیتگ ۔ دوئیں رہشوناں اے درک ءَ را دمگ ءِ استحکام ءُ دائمی امن ءِ ھاتر ءَ سک باز وش آتک لیک اتگ۔ تہی کارانی وزیر محسن نقوی ءَ ایران ءُ امریکہ ءِ گپ ءُ تران ءِ سوبمندی ءُ پاکستانی حکومت ءِ نیمگ ءَ اے رد ءَ ٹھوس گامگیج آنی سر ءَ دل یکیمی ءِ درشان کت۔ وفاقی وزیر داخلہ محسن نقوی ءَ گوشت کہ خطہ ءَ کش ءُ چیل ءِ ھلاسی ءِ کریڈٹ پاکستان ءَ را رسیت، ما اللہ تعالیٰ ءِ دیم ءَ جھک ایں کہ مئے عاجزیں کوشست منگ بوتگ انت۔ آئی ءَ گیش گوشت کہ اے راجدپتری امن مشن ءِ تہ ءَ مزن وزیر ءُ فیلڈ مارشل ءَ بے دروریں  کرد پیلو کتگ۔ جماعت اسلامی ءِ سروک حافظ نعیم  الرحمان ءَ اے راجدپتری مشن ءِ تہ ءَ پاکستان ءِ مخلص ءُ سفارتی کرد ءِ توسیپ کت ءُ گوشت کہ ایران ءُ امریکہ ءِ مفاہمت ءِ تہ ءَ پاکستان ءِ راجدپتری کرد مدام یات کنگ بیت، پرچا کہ ایشی ءَ سرجمیں دمگ ءَ دائمی امن ءِ راہ پچ کتگ۔ گند ءُ نند ءِ ساھت ءَ جماعت اسلامی ءِ سروک حافظ نعمی الرحمان ءَ سومالیہ ءَ اوشتاتگیں پاکستانی شہری آنی نگیگیں جاور ھال ھم وزیر ءِ تہی کارانی دیم ءَ ایر کتگ اَنت۔ آہاں لوٹ کتگ کہ سومالیہ ءِ حکومت وتی جوانیں  سفارتی کرد ءُ ملک ءَ بندیں پاکستانی آنی ترندیں، ایمن ءُ باوقاریں ریکوری ءِ ھاتر ءَ درستیں وسیلگ آناں کارمرد بہ کنت، ایشی ءَ را وزیر داخلہ ءَ سرجمیں کمک ءِ یقین دہانی کتگ۔ دوئیں رہشوناں اے گپ ءِ سر ءَ تپاک کت کہ ملک ءِ معیشت ءَ را گہتر کنگ ءُ مظلومیں ٹک آناں زوتیں رنگ ءَ ریلیف دیگ ءِ واستہ ترندیں جیڈھ آنی سر ءَ ٹھوس گامگیج چست کنگ لوٹ ایت۔