اسلام آباد۔ 18جولائی (اے پی پی) وزات مذہبی امور سرکاری اسکیم نا رداٹ عازمین تے حج انا فرض انا ادائیگی کن حج مبارک آ سرمننگ نا بابت حج جہاز آتا شیڈول ئِ گڈیکو دروشم تسنے ہرانا باقاعدہ پڑو ئِ (اینو) سے شنبے آ کننگک۔ اولیکو 15دے حج جہاز آک براہ راست مدینہ منورہ غاکارہ۔ وزارت مذہبی امور نا ذرائع نا پاننگ ئِ کہ اینخو نا سال 71684پاکستانی عازمین سرکاری اسکیم نا رداٹ حج انا فرض ئِ ادا کیرہ وخت اس کہ جمی وڑاٹ اسہ لکھ 43ہزار 368 پاکستانی حج انا فرض ئِ اداکننگ کن حج مبارک آ کارہ۔ وزارت مذہبی امور حج فلائٹ شیڈول ئِ گڈیکو دروشم تسنے ہرانا رداٹ اولیکو 15دے حج جہاز آک براہ راست مدینہ منورہ غا کارہ۔ اوپارے کہ براہ راست مدینہ منورہ غا رسینگوک آ عازمین تا واپسی جدہ آن وخت اس کہ جدہ بالی پٹ آ دڑنگوک آ حاجی تا وطن آ پدی بننگ مدینہ منورہ غان مریک۔ 4اگست آ ملک انا 5بھلا شار تیان حج جہاز آک رادہ مریرہ۔ فیصل آباد آن 4اگست آ سہب انا یانزدہ بجہ غا، اسلام آباد آن 4اگست آ سہب انا وختی چارئُ نیم بجہ غا، کراچی آن 4اگست آ سہب انا وختی چارئُ نیم بجہ غا، 4اگست آ ہی لاہور آن سہب انا شش ئُ نیم و پشاور آن پیشیم نا یک ئُ نیم بجہ غا جہاز آک رادہ مریرہ۔ وزارت مذہبی امور نا پاننگ ئِ کہ حج جہاز آتا شیڈول ئِ چارشنبے آ وزارت مذہبی امور نا ویب سائٹ آ خننگ مریک وخت اس کہ ہندا دے چھٹی راہی کننگ آن بیدس ایس ایم ایس و سوشل میڈیا نا ذریعہ ہم عازمین تے مطلع کننگک۔ یات سلے کہ عازمین حج ئِ حج مبارک آ رسینگ انگ کن فلائٹ آپریشن 4اگست آن 5ستمبر اسکان برجاسلک۔ حاجی تا وطن آپدی بننگ حج انا دمدستی گڈ شروع مریک۔