سعودی عرب، ترکی،بنگلہ دیش، انڈونیشیا ، فرانس اٹی دہشت گردی نا جلہو آتا مذمت بھارت نا غاصبانہ کوزہ نا برخلاف کشمیری تا اخلاقی ، سفارتی و سیاسی مخ تفی ئِ برجاتخنہ، وزیراعظم نا دیوان آن تران

اسلام آباد۔ 15جولائی (اے پی پی) بنجائی کابینہ خصوصی دیوان اٹی مقبوضہ کشمیر اٹی بھارتی سیکورٹی فورسز آتا دوتے اٹ بے گناہ کشمیری تا شہیدی و بھارتی ظلم انا برخلاف بروک آ سے شنبے آ یوم سیاہ اڈتننگ نا پڑوئِ کرینے۔ بنجائی کابینہ نا خصوصی دیوان وزیراعظم محمد نواز شریف نا کماشی ٹی جمعہ آ گورنر ہاﺅس لاہور اٹی اڈ ہلک۔ وزیراعظم نا صلاح آ کابینہ مقبوضہ کشمیر اٹی بھارتی ظلم انا برخلاف یوم سیاہ اڈتننگ نا فیصلہ کریر۔ کابینہ مقبوضہ کشمیر نا حالیت آتیا غور اکن پارلیمنٹ نا اسیجائی دیوان ئِ بٹنگ انگ نا ہم فیصلہ کرے۔ کابینہ نا خصوصی دیوان آن تران کرسا وزیراعظم محمد نواز شریف پارے کہ کشمیری تا تحریک، آجوئی نا تحریک ئِ و بھارت نا ظلم اودے پین سوگوی ایتک۔ اوپارے کہ بھارت نا ہفت لکھ فوج کشمیر نا تحریک ئِ توننگ کتو و نہ ہی توننگ کیک۔ نواز شریف پارے کہ نن جہانی ضمیر ئِ بش کینہ، نن بھارت نا غاصبانہ کوزہ نا برخلاف کشمیری تا اخلاقی ، سفارتی و سیاسی مخ تفی ئِ برجاتخنہ۔ اوپارے کہ پاکستان نا غٹ ادارہ غاک بھارت نا غاصبانہ کوزہ و کشمیری تیا ظلم ئِ جہانی کہول آ تالان کیر۔ وزیراعظم پارے کہ برہان وانی آجوئی نا سپاہی ئس۔ کشمیریک تینا حق ئِ ہلور گڑا چپ کرور۔ اوپارے کہ ای و پاکستانی قوم تینا کشمیری ایڑ و ایلم تے تون تفوک اُن ۔ اوکان مست خارجہ سیکرٹری اعزاز چوہدری کابینہ ئِ مقبوضہ کشمیر نا حالیت آتا بارواٹی بریفنگ تس۔ بنجائی کابینہ سعودی عرب، ترکی، بنگلہ دیش، انڈونیشیا، فرانس اٹی دہشت گردی نا جلہو آتا مذمت ئِ کرسا قیمتی جان تا زیان آ ڈکھ انا درشانی ئِ کرے۔ کابینہ پنی راجی ورکر عبدالستار ایدھی، پنی اقوام امجد صابری و کشمیری شہید آتے کن فاتیا خوانی ہم کرے۔