اقوام متحدہ۔ 15جولائی (اے پی پی) پاکستان مقبوضہ کشمیر اٹی خراب مروک حالیت آتے امن و سلامتی کن اسہ بھلو خلیس اس گوندسا علاقہ ٹی ماورائے عدالت خون نا واقعہ غاتا شفاف و آزادانہ جاست وپاست نا خواست ئِ کرینے۔ اقوام متحدہ ٹی پاکستان مشن نا کنڈآن جاری بیان نارداٹ جہانی ادارہ ٹی پاکستان نا آخبتی مندوب ڈاکٹر ملیحہ لودھی دا ہیت ئِ اقوام متحدہ نا سیکرٹری جنرل ایڈمنڈ ملے ئِ کشمیر نا حالیت آتیا بریفنگ اٹی پارے۔ اوپارے کہ مقبوضہ کشمیر اٹی خلقت آک مقبول ورنا کسرشون برہان وانی نا خون نا برخلاف برانزی مچی کننگ ئُ و کوزہ گر بھارتی فوج دا مچی کروک آ شریک مروک آتا برخلاف وحشیانہ ہتھکنڈہ ئِ کاریم اٹ ہتنگ ئِ ، دا ہتھکنڈہ غاتیٹی کودک شاری تیا سم کاری ہم اوڑدہ ئِ ہرانا نتیجہ ٹی داوخت اسکان 40 کشمیری شہید مسنو و مست آن کشیدہ حالیت آک پین خراب مننگ ئُ۔بھارتی سیکورٹی فورسز آتا کارروائی تیٹی 1500 آن زیات بندغ ٹھپی مسنو ہرافتے آن کیہی تا حالیت نازرک ئِ۔ اقوام متحدہ نا انڈر سیکرٹری جنرل ایڈ منڈ ملے داوخت آ پاکستانی مندوب ئِ پارے کہ سلامتی کونسل ئِ مقبوضہ کشمیر اٹی خراب مروک حالیت آتیا گڑتی ئِ و اگہ پاکستان و بھارت رضامند مریر تو او دا ویل آ ہڑتوم آ ملک آتا نیام اٹ ثالثی کن تیارئِ۔ اوپارے کہ جہانی ادارہ نا سیکرٹری جنرل بان کی مون ہم مقبوضہ کشمیر اٹی بگڑینگوک حالیت آتیا گڑتی نا درشانی ئِ کرینے۔ ڈاکٹر ملیحہ لودھی پارے کہ مقبوضہ کشمیر نا حالیت آک امن وسلامتی کن اسہ بھلو خلیس اس مننگ نا سوب جہانی برادری کن گڑتی نا بایدے سوب مریر۔ اومقبوضہ کشمیر اٹی کودک شاری تا برخلاف واک انا وحشیانہ کاریم اٹ ہتنگ نا ہم مذمت ئِ کرے۔ اوپارے کہ بھارتی فوج پرامن مچی کروک آتے منتشر کننگ کن براہ راست سم کاری تون اوار اوار پیلٹ توفک آتے کاریم اٹ ہتنگ ئِ۔ ہراڑآن ٹھپی مروک آتا بھلو کچ اس آخبتی وڑاٹ بینائی آں محروم مننگ ئُ۔ پاکستانی مندوب پارے کہ مقبوضہ کشمیر نا چندی ضلع غاتیٹی تدوک آ کیہی دے آن کرفیو نافذ ئِ ہراڑآن خلقت آتے ناقابل بیان مشکلات آتا مون تروکی ئِ و حریت کسرشونک تینا اُراتے ٹی نظر بند ئُ۔ بھارتی فوجیک مقبوضہ کشمیر اٹی ہسپتال آتیا ہم جلہو کرینو و دا جلہو تا وخت آ ڈاکٹر و ایلو عملہ ئِ ہراساں کننگ نا ہم احوال آک رسینگانو۔ کوزہ گر بھارتی فوجیک ایمبولینس آتیا ہم جلہو کرینو۔ بھارت مسلمہ حق خودارادیت کن جہد کروک آتے دہشت گرد پارسا حق ئِ مسخرہ اس سمجھنگ ئِ و اونا نتیجہ ٹی کشمیر الس اٹی مزدی اشتعال تالان مننگ ئِ۔ پاکستانی مندوب مستی پارے کہ سلامتی کونسل نا قرارداد آتے ٹی کشمیری تے حق خودارادیت تننگ نا وعدہ کننگانے و جہانی ادارہ دا وعدہ ئِ پورو کننگ نا زمہ وار ئِ۔ جہانی برادری بھارت آ انسانی حق و کشمیر نا ویل ئِ پرامن وڑاٹ و اقوام متحدہ نا قرارداد آتا رداٹ ایسر کننگ نا وعدہ غاتے پورو کننگ کن زورشاغے۔ پاکستانی مندوب اوکان مست اقوام متحدہ نا جنرل اسمبلی نا مون آ ہم مقبوضہ کشمیر نا بگڑینگوک آ حالیت آتے پبی وڑاٹ پیش کرسا دابابت سلامتی کونسل نا قرارداد آتیا عملدرآمد نا خواست ئِ کرے۔
