کوئٹہ۔ 14جولائی (اے پی پی) مچ آ ملک آمبار صوبائی دارالحکومت کوئٹہ ٹی ہم کشمیری الس تون یکجہتی نا درشانی کن کیہی سیاسی جماعت، سول سوسائٹی انجمن تاجران ، طالب علم تنظیم تا کنڈآن ایوب اسٹیڈیم آن اسہ ریلی اس کشنگا ، ریلی نا شریک مروک آک بینرز و پلہ کارڈز چست کریسر ہراڑآ اقوام متحدہ آن خواست نوشتہ ئسک کہ ہندوستان کشمیری الس آ ظلم و ستم نا چرجوئی ئِ بند کے و کشمیری تے اوفتا مرضی و آجوئی اٹ رہینگ انگ نا حق تننگے۔ ریلی نا سروکی ئِ صوبائی وزیر جعفرخان مندوخیل ، باسک صوبائی اسمبلی عبدالکریم نوشیروانی و ترجمان حکومت بلوچستان انوارالحق کاکڑ کریر۔ پریس کلب کوئٹہ نا مون آ برانزی ریلی نا شریک مروک آتیان تران کرسا صوبائی وزیر جعفر خان مندوخیل پارے کہ کشمیری الس آ ہندوستانی فوج انا ظلم انا دنیا نوٹس ئِ ہلے و کشمیری تے اوفتا مرضی و اقوام متحدہ نا قرارداد آتا رداٹ زند ئِ تدیفنگ نا حق تننگے۔ اوپارے کہ بے گناہ کشمیری تیا ظلم و بیدادی نا چرجوئی داسا بایدے بند مرے، ہندوستان نا ظلم و بے گناہ کشمیری تا خون رنگ اس ہتیک۔ ریلی نا شریک مروک آتیان تران کرسا مسلم لیگ (ق) نا باسک صوبائی اسمبلی میر عبدالکریم نوشیروانی پارے کہ دنیا نا ہچ ئُ واک اس کشمیر ئِ پاکستان آن جتا کننگ کپک دنیاداسا ہندوستان نا ظلم انا نوٹس ئِ ہلے حکومت بلوچستان نا ترجمان انوارالحق کاکڑ ریلی نا شریک مروک آتیان تران کرسا پارے کہ اینو مچ آ دنیا آمبار پاکستان نا کیہی شار تے ٹی کشمیری الس تون یکجہتی نا درشانی و ہندوستان نا ظلم انا برخلاف برانز مننگ ئِ و خواست کننگ انگ ئِ کشمیری الس ئِ اقوام متحدہ نا قرارداد آتار داٹ آجوئی نا حق تننگے اوخواست کریر کہ دنیا ہندوستان ئِ دہشت گرد ملک اس گوندے داوخت اسکان لکھ آ کودک کشمیری تے شہید کننگانے ولے تاریخ گواہ ئِ کہ کشمیری تا توارئِ بند کننگ مفک۔ اوپارے کہ دنیا ہندوستان ئِ دہشت گرد ملک اس گوندے و کشمیری تے اوفتا مرضی نا رداٹ رہینگ انگ نا حق تننگے۔ حکومت بلوچستان نا ترجمان پارے کہ کشمیر ئِ دنیا نا ہچ ئُ واک اس پاکستان آن جتا کننگ کپک، کشمیر پاکستان نا بشخ ئِ و مریک۔ ریلی نا شریک مروک آتیان جماعت اسلامی نا صوبائی کسرشون مولانا عبدالکبیر شاکر ، ڈاکٹر عطاءالرحمان تران کرسا پاریر کہ بھارتی فوج انا دوتے اٹ کودک و بے گناہ کشمیری تا شہیدی داسا رنگ اس ہتیک و دنیا نا مون آ ہندوستان آن مکروہ دروشم پاش مسنے دنیا ہندوستان نا ظلم آ توار چست کے پاکستان کشمیری تا مخ تفی ئِ برجاتخک۔ ریلی نا شریک مروک آتیان تران کرسا ہزار ڈیموکریٹک پارٹی نا کسرشون رضاوکیل پارے کہ کشمیر پاکستان نا اٹوٹ انگ ئِ اودے پاکستان آن دنیا نا ہچ ئُ واک اس جتا کننگ کپک، ریلی نا شریک مروک آتیان کشمیری کسرشون شوکت کشمیری ، پاکستان ورکز پارٹی نا کسرشون خدائے دوست کاکڑ، شوکت بلوچ ، تحریک انصاف نا کسرشون و ایلوفک کشمیر نا الس تون یکجہتی نا درشانی ئِ کریر ۔ آخراٹی ریلی نا شریک مروک آک ہندوستان نا بیرک ئِ خاخر تسر۔ داکان مست ایوب اسٹیڈیم آن اسہ ریلی اس کشنگا ہراٹی کیہی سیاسی جماعت ، سول سوسائٹی و طلبا ءتنظیمک شرکت کریر ، ریلی نا شریک مروک آک جتا کسرتیان مرسا پریس کلب کوئٹہ نامون آ برانزی مچی کریر۔
