اسلام آباد۔ 14جولائی (اے پی پی) صدر مملکت ممنون حسین ئِ پاکستان اٹی تعینات شش ملک آتا سفیر آک تینا سفارت سند آتے پیش کریر۔ پنچ شنبے نا دے ایوان صدرا ٹی اسہ پروقار دود اسے ٹی سفارت سند پیش کروک آتے ٹی سویڈن، صومالیہ، کوریا، آذربائیجان، سوڈان نا سفیرآک و بنگلہ دیش نا ہائی کمشنر اوڑدہ ئسر۔ داکان مست ہر ملک انا پندار سفیر ئِ جتا جتا بھگی آ ایوان صدر نا بنجائی درگہ غا ہتنگا ہراڑے اوفتے گارڈ آف آنر پیش کننگا۔ داوخت آ تعلقدار ملک و پاکستان نا قومی ترانہ ئِ پیش کننگا۔ اوکان گڈ تعینات سفیر آک واری واری صدر مملکت تون اوڑدہی کریر۔ داوخت آ صدر مملکت ممنون حسین پارے کہ پاکستان غٹ ملک آتون دوستانہ و برادرانہ تعلقداری خواہک۔ خاص وڑاٹ ڈیہہ ٹی امن کن ہمسایہ ملک آتون دوستانہ تعلقداری بھاز اہم ئِ۔ صدر مملکت پارے کہ پاکستان اٹی زرکاری نا بھلو وارخواہی اس ساڑی ئِ و اوڑآن بین الاقوامی زرکارآتے پبی فائدہ ہرفوئی مرے۔ صدر مملکت پارے کہ پاکستان دہشت گردی نا برخلاف بے پناہ قربانی تس و اونا چٹفنگ کن پرعزم ئِ۔ اوپارے کہ آپریشن ضرب عضب سرسہبی اٹ جاریئِ و آخریکو دہشت گرد انا چٹفنگ اسکان دا آپریشن برجاءسلک۔ صدر مملکت پوسکن تعینات مروک آ سفیر آتے موارکبادی تس و دا اومیت نا درشانی ئِ کرے کہ او تینا ملک آتون پاکستان نا تعلقداری تے پین مون آ دیر۔ صدر مملکت پارے کہ دا سفیر تا ساڑی گری پاکستان کن خوشی نا سوب مریک۔ سفارت سند پیش کروک آتے ٹی آذربائیجان نا سفیر علی فکرت اوگلوعلی زادہ، کوریا نا سفیر سوڈونگ گیو، صومالیہ نا سفیر خدیجہ محمد المقسومی، سوڈان نا سفیر ٹگلدین علیدی الطاہر، سویڈن ناسفیر انگریڈ جونسن و بنگلہ دیش نا ہائی کمشنر طارق احسن اوڑدہ ئسر۔
