اسلام آباد۔ 14جولائی (اے پی پی) جشن آجوئی دے انا بابت 14اگست آ خصوصی آجوئی ٹرین اس چلیفنگ نا تیاری تا جاچ ئِ ہلنگ کن پنچ شنبے آ وزارت اطلاعات ، نشریات و قومی میرات اٹی بڑزکو کہول نا دیوان اس اڈ ہلک۔ بنجائی وزیر اطلاعات، نشریات و قومی میرات سینیٹر پرویز رشید و بنجائی وزیر ریلوے خواجہ سعید رفیق اسیجائی وڑاٹ دیوان نا کماشی ئِ کریر۔داوخت آ سینیٹر پرویز رشید پارے کہ آجوئی دے ئِ شون و شان وڑاٹ اڈتننگک۔ او غٹ قومی ادارہ غاتیا زورشاغا کہ او قومی نظریہ ئِ تالان کننگ اٹی تینا کڑد ئِ ادا کیر۔ خواجہ سعد رفیق پارے کہ داسال آجوئی ٹرین کن زیات جامع بست و بند کننگک۔ اوپارے کہ آجوئی ٹرین نا روٹ و شیڈول نا پرنٹ و الیکٹرانک میڈیا آ تشہیر ئِ کننگک تانکہ لس بندغ نا زیات آن زیات شرکت ئِ باوری جوڑ کننگ مرے۔ دیوان ئِ پاننگاکہ آجوئی ٹرین پشاور آن بنا کیک و ہر چار آ صوبہ غاتیان گدرینگ انگ آن گڈ نیمہ ستمبر اسکان کراچی ٹی اختتام پذیر مریک۔ پی ٹی وی، پی بی سی و اے پی پی نا سینئر کمامدار آک آجوئی ٹرین آن بابت دودآتا کوریج نا تینا لائحہ عمل نا بارواٹی دیوان ئِ معلومدار کریر۔ دیوان اٹی سیکرٹری اطلاعات و نشریات و قومی میرات سید عمران گردیزی و سیکرٹری کابینہ ڈویژن ندیم حسن عارف شرکت کریر۔ دیوان اٹی اطلاعات و نشریات و ریلویز نا وزارت و اوڑتون منسلک محکمہ غاتا سینئر کمامدارآک ہم ساڑی ئسر۔
