اسلا م آباد۔ 13جولائی (اے پی پی) برطانیہ نا ڈپٹی کمانڈر لیفٹیننٹ جنرل سینڈی سٹوری دہشت گردی نا برخلاف جنگ اٹی پاکستان نا کوشست آتا ستائِ کرسا داجنگ اٹی برطانیہ نا جاری کمک نا باوری ئِ ترفینے۔ وزیراعظم نا خصوصی کمکار برائے امور خارجہ طارق فاطمی تون اوڑدہی نا وخت آ او علاقائی سیکورٹی و اوٹی گچینی نا جاچئِ ہلک۔ خصوصی کمکار آپریشن ریزولیوٹ سپورٹ نا کمانڈر ئِ پارے کہ پاک برطانیہ ہڑتوم آ کنڈانا تعلقداری تیٹی مثبت ودکی جاری ئِ۔ اوہڑتوم آ ملک آتا نیام اٹ جاری دفاعی کمک آ ہم تینا است جمی نا درشانی ئِ کریر۔ خصوصی کمکار اومیت ظاہر کرے کہ ہڑتوم آ کنڈآتا دفاعی و سیکورٹی معاملہ غاتے ٹی جوڑ جاڑی و خڑکی کمکاری ئِ پین سوگو جوڑ کننگک۔ اوپارے کہ پاکستان آپریشن ضرب عضب نا کمک اٹ دہشت گردی نا برخلاف جنگ اٹی نمان کڑد ادا کرینے ہراداسا گڈیکو مرحلہ ٹی ئِ۔ اوبرطانوی ڈپٹی کمانڈر ئِ پرامن ہمسائیگی نا بارواٹی وزیراعظم نا وژن و دا چرجوئی ٹی چست کروک آ چندی گام گیج آتیان ہم معلومدار کرے ۔ اوبرطانیہ ٹی کنزرویٹو پارٹی نا کسرشون تھریسامے نا بطور وزیراعظم پنداری ناہم مبارکبادی تس و دا پت انا درشانی ئِ کرے کہ اونا سروکی ٹی پاک برطانیہ تعلقداری تے ٹی پین ودکی مریک۔
