اسلام آباد۔ 13جولائی (اے پی پی) وزیراعظم محمد نواز شریف پارینے کہ کشمیر نا ویل انا ایسری اقوام متحدہ سلامتی کونسل نا قرارداد آتارداٹ جموں و کشمیر نا الس ئِ خودارادیت نا ذریعہ ہی مننگ کیک۔ پاکستان نا حکومت و الس تینا کشمیری ایلم تا جوزہ غاتا شرف ئِ کیرہ و بین الاقوامی فورم تیا کشمیر کاز انا مخ تفی ئِ ہر قیمت اٹ برجاتخنہ۔ اوداہیت ئِ کشمیر نا بارواٹی پارلیمان نا خصوصی کمیٹی نا چیئرمین و جمعیت علماءاسلام (ف) انا امیر مولانا فضل الرحمان تون چارشنبے آ لاہور اٹی مروک آ اوڑدہی ٹی پارے۔ مولانا فضل الرحمان وزیراعظم نا جان جوڑی نا بارواٹی ہریفے و اونا زوت جان جوڑی کن نیک است خواہی نا درشانی ئِ کرے۔ اوڑدہی نا وخت قومی اہمیت نا معاملہ غاتیا درشانِ خیال مس۔ جے یو آئی (ف) نا سروک وزیراعظم ئِ جموں و کشمیر اٹی بھارتی ملٹری و پیراملٹری فورسز آتا کنڈآن انسانی حق انا خلاف ورزی تا بابت کشمیر ی سروک آتون تینا ساڑی آ ہیت و گپ نا بارواٹی معلومدار کرے۔ اوڑدہی ٹی بھارتی فوج انا دوتے اٹ کشمیری کسر شون برہان وانی و ایلو کیہی شاری تا شہیدی نا واقعہ غاتا مذمت نا اعادہ کننگا۔ مولانا فضل الرحمان کشمیری سروک و پاکستان نا الس نا جوزہ غاتا درشانی ئِ کرساپارے کہ کشمیری سروک آک مشکل وخت اٹی پاکستان نا پلو آ ہُننگ ئُ ۔ وزیراعظم محمد نواز شریف پارے کہ پاکستان نا حکومت و الس تینا کشمیری ایڑ و ایلم تا جوزہ غاتا شرف ئِ کیرہ و او خواہ انتس کہ مرے، ہر بین الاقوامی فورم آ کشمیر نصب العین نا مخ تفی ئِ برجاتخنہ۔ وزیراعظم پارے کہ مقبوضہ کشمیر نا الس نا توار و جہد ئِ وحشیانہ طاقت و انسانی حق انا خلاف ورزی تا ذریعہ توننگ مفک۔ اوپارے کہ کابینہ نا خصوصی دیوان نا مسخت جموں و کشمیر نا بے گناہ شاری تا برخلاف بھارتی سیکورٹی فورسز آتا استبدادی گام گیج آتا بناءآ مقبوضہ کشمیر اٹی ترندی اٹ بگڑینگوک آ حالیت آتا تناظر اٹی مقبوضہ کشمیر نا سروک و الس نا مخ تفی کن بروک آ وڑوڈول ئِ وضع کروئی ئِ۔ وزیراعظم پارے کہ اقوام متحدہ نا رداٹ اسہ صاف و غیر جانبدارانہ استصواب رائے نا کمک اٹ سلامتی کونسل نا قرارداد آتا رداٹ جموں وکشمیر نا الس ئِ اوفتا حق خودارادیت ترسا ہی جموں وکشمیر نا تنازعہ نا ایسری ممکن ئِ۔ اوڑدہی ٹی وزیراعلیٰ پنجاب محمد شہباز شریف ، وزیر داخلہ چوہدری نثارعلی خان و بنجائی وزیر اکرم درانی ہم ساڑی ئسر۔
