فوج ءِ سر ءَ ایراد ملکی  سلامتی ءَ گوں   مسکرائی کنگ اِنت،  عبدالعلیم خان

فیصل آباد۔ 07 دسمبر (اے پی پی):وفاقی وزیر مواصلات عبدالعلیم خان ءَ گوشت کہ پاکستانی سلاھ بندیں اُرد ءِ برکت ءَ ملک آزات، ایمن اِنت ءُ دژمن ءِ ھمک اُرش ءَ را دیم ءِے کنگ ءِ لائک اِنت۔ پمشکا سوشل میڈیا ءِ سر ءَ فوج ءِ ھلاپ ءَ پروپیگنڈا کنوکیں مردم بائد انت کہ آ راج ءِ قربانی ءَ سرپد بہ بنت ءُ اے وڑیں ردیں توار سرکاری رنگ ءَ رد کنگ بہ بنت۔ یک شمبے ءِ روچ ءَ ادا ورکرز کنونشن ءَ گوں گشتانک دیان ءَ آئی ءَ گوشت کہ آرمی چیف ءَ را نوکیں پوسٹ ءِ رسگ پاک فوج ءِ پیشہ وارانہ کامیابی ءُ غیر معمولی ازمت آنی منگ اِنت۔ آئی ءَ گوشت کہ اُرد ءَ 10مئی ءَ بھارت ءِ نیمگ ءَ میزائل ءُ ڈرون اُرش آنی سر ءَ مزنیں دلیری ءُ ہنر ءِ گوما پسو داتگ ءُ دژمن ءَ را مھکمیں کلوہ داتگ کہ پاکستان کجام ھم زوراکی ءَ گوں دیم پہ دیم بوھگ ءِ لائک اِنت۔ آئی ءَ گوشت کہ نگدکار اے جیڑگ ءَ بہ کن اَنت کہ اگاں پاکستانی اُرد مہ بیت گڈا دژمن ءِ ملک ءَ چون اے دمگ ءَ وتی واھگ مسلط کتگ اَت پرچہ کہ راجدپتر گواہ اِنت ءُ بہر ءُ بانگ ءَ پیسر مسلمان آنی گوما دژمنی ءِ رویہ چہ کس ءَ چیر نہ اِنت۔ آئی ءَ گوشت کہ پاک فوج ءِ سپاھیگ وتی جان، وتی باندات ءُ وتی گس ءِ وشھالی ءَ ندر کن اَنت تانکہ راج امن ءُ ایمنی ءِ تہ ءَ زندگ بہ بیت ءُ ھمے قربانی ءِ آسر ءَ مرچی پاکستانی شہری ایمن اَنت ۔ وفاقی وزیر ءَ پنڈی بھٹیان ءَ چہ فیصل آباد ءَ تاں موٹروے ءَ را چار لین ءَ چہ شش لین ءَ را گیش کنگ ءِ جار جتگ ءُ گوشت کہ اے منصوبگ ءِ سر ءَ آیوکیں سال ءَ کار بندات بیت۔ آئی ءَ فیصل آباد گتوالہ ءَ چہ لاہور ءَ تاں سڑک ءِ زوتیں وھد ءَ جوڑ کنگ ءِ دل یکیمی ھم دات۔