انڈونیشیا ءِ صدر 8 ءُ 9 دسمبر ءَ اسلام آباد ءِ سرکاری تر ءُ تاب ءَ کنت، درئی کارانی کارگس ءِ جارکش

اسلام آباد۔7دسمبر  (اے پی پی):مزن وزیر محمد شہباز شریف ءِ دعوت ءِ رد ءَ جمہوریہ انڈونیشیا ءِ صدر پرابوو سوبیانٹو 8 ءُ 9 دسمبر ءَ اسلام آباد ءِ سرکاری تر ءُ تاب ءَ کنت، آ یک مزنیں تک ءِ ڈل ءِ گوما سر بیت کہ ایشی ءِ تہ ءَ کلیدی وزیر ءُ مزنیں کارندہ ھوار اَنت۔ یک شمبے ءِ روچ ءَ درئی کارانی کارگس ءِ جارکش ءِ نیمگ ءَ جاڑی بوتگیں بیان ءِ رد ءَ اے صدر پرابو سوبیانٹو ءِ پاکستان ءِ اولی تر ءُ تاب بیت۔ انڈونیشیا ءِ گڈی صدارتی تر ءُ تاب 2018 ءَ صدر جوکو ویڈوڈو ءِ بوتگ ات۔اے تر ءُ تاب ءِ ھاسیں ارزشت ھم است انت کہ اے سال ءَ پاکستان ءُ انڈونیشیا ءِ نیام ءَ سفارتی سیادی ءِ جوڑ بوھگ ءِ 75 سال سرجم بوتگ۔ وتی نندگ ءِ وھد ءَ صدر پرابو سوبیانتو مزن وزیر ءِ گوما ڈل ءِ تک ءَ گپ ءُ تران کنت ءُ پاکستان ءِ صدر آصف علی زرداری ءَ گوں ھم گند ءُ نند کنت۔ پاک اُرد ءِ سروک ءُ دفاعی اُرد ءِ سروک فیلڈ مارشل سید عاصم منیر ءَ ھم صدر پرابو سوبیانتو ءَ گوں گند ءُ نند کنت۔ تر ءُ تاب ءِ ساھت ءَ دوئیں ملک آنی نیام ءَ تجارت، سرمایہ کاری، دفاع، جان سلامتی، آئی ٹی، موسمی بدلی، وانگ ءُ زانگ، دود ءُ ربیدگ ءُ دمگی ءُ جھان ءِ شریکداری ءَ را گیش مھکم کنگ ءَ ھوار جتا جتائیں شوبگ آنی تہ ءَ کمک ءَ را دیمروئی دیگ ءِ ھوالگ ءَ سرجمیں رنگ ءَ گپ ءُ تران کنگ بیت۔ اے موہ ءِ سر ءَ بازیں مفاہمت نامہ ءِ سر ءَ دستخط کنگ ءِ ھم امکان اِنت۔ پاکستان ءُ انڈونیشیا ءِ نیام ءَ یکجائی قدر ءُ یکوئی مفاد آنی بنیات ءَ نزیکیں، دلپھکی ءُ دیریں سیادی است انت۔ صدر پرابوو سوبیانٹو ءِ اے تر ءُ تاب ءَ چہ دو نیمگی سیادی ءَ را گیش مھکم کنگ ءُ دوئیں نیمگ ءَ چہ فائدگ مندیں کمک ءَ را گیش کنگ ءِ ھاترا یک ھاسیں موہ ءِ پجارینگ بیت، ایشی ءَ چہ دوئیں ملک آنی نیام ءَ شریکداری ءِ برجاھیں دیمروئی ءَ کمک رسیت۔