ملک ءِ اقتصادی گہتری ءِ واستہ پیسلہ کنوکیں گامگیج کنگ بوہگ ءَ انت، علی پرویز ملک

لاہور۔7دسمبر  (اے پی پی):پٹرولیم ءِ وفاقی وزیر علی پرویز ملک ءَ گوشت کہ اقتصادی گہتری ءِ واستہ پیسلہ کنوکیں گامگیج کنگ بوھگ ءَ انت وھدیکہ پاکستان ءِ ساکھ جھان ءِ تک ءَ مھکم بوھگ ءَ انت۔ ٹیکس ءِ کمی، افراط زر ءِ کنٹرول، برآمدات ءِ دیمروئی، ورنا آنی واستہ روزگار ءُ توانائی ءِ شوبگ ءَ استحکام حکومت ءِ اولی ترجی انت۔ آئی ءَ یک شمبے ءِ روچ ءَ شادباغ ءَ چیئرمین پی ایچ اے غزالی سلیم بٹ ءِ گوما ملکی جاور، اقتصادی پالیشی، توان ءِ شوبگ، سرمایہ کاری ءُ راجی سلامتی ءِ جیڈھ آنی سر ءَ میڈیا ءَ گوں گپ ءُ تران کنگ ءَ ات۔ علی پرویز ملک ءَ گوشت کہ مزن وزیر محمد شہباز شریف ءُ نائب مزن وزیر اسحاق دار ءَ پاکستان ءِ جہانی تک ءَ جوانیں عکس ءِ بحال کنگ ءَ مزنیں کردے پیلو کتگ، ہمے سبب انت کہ مرچی میاں اوستمانی براتی ءُ امریکہ پاکستان ءِ بابت ءَ دلبڈی ءِ رنگ ءَ گپ جنگ ءَ گندگ بوھگ ءَ انت وھدے کہ دیوالیہ کاری ءِ گونج ءِ سبب ءَ پاکستان ءِ بابت ءَ گونج بوتگ۔ آئی ءَ گوشت کہ حکومت ءَ خسارہ ءَ را سوبمندیں رنگ ءَ کنٹرول کنگ ءِ نیمگ ءَ مزنیں پیشرفت کتگ۔ یک جستے ءِ پسو ءَ وفاقی وزیر ءَ گوشت کہ مہلوک ءِ لوٹ ءِ سر ءَ نا معیاری گیس ءِ سلنڈر آنی جیڈھ گیش ءُ گیوار کنگ بوتگ ءُ زمستان ءِ وھد ءَ الس آنی آسراتی ءِ واستہ دو لکھ لکھ ءَ چہ سئے لک نوکیں کنکشن پجاری کنگ بوھگ ءَ انت۔ توان ءِ شوبگ ءَ گہتری ءِ ھوالگ ءَ آئی ءَ گوشت کہ سرکلر ڈیبٹ ءِ کنٹرول ءِ واستہ عملی گامگیج کنگ بوھگ ءَ انت وھدیکہ ترک پٹرولیم اسلام آباد ءَ وتی کارگس ءَ را پچ کنگ ءَ انت ایشی ءَ چہ پاکستانی آنی واستہ روزگار ءِ نوکیں موہ پیداک بنت۔ آئی ءَ گوشت کہ پاکستان گیس ءُ تیل ءِ درآمد ءِ سر ءَ وتی انحصار ءَ را کم کنگ ءِ واستہ آذربائیجان ءِ گوما وتی شریکداری ءَ را گیش ءُگیوار کنگ ءَ انت ءُ مچھی ءَ چہ تھلیان ءَ نوکیں پائپ لائن ءِ جنئگ ءَ انت۔ آئی ءَ گوشت کہ دگنیا ءِ توان ءِ اولی ترجی بدل بوھگ ءَ انت ءُ بجلی ءِ نیمگ ءَ رھادگ بوھگ ءِ درگت ءَ پاکستان ءَ پوپل ءِ درگیجگ ءُ کان کنی ءَ گوں تیزی ءَ گوں دیمروئی کنگ ءَ انت۔ بلوچستان ءِ شھر چاغی ءَ شش ءَ بگر داں ھپت ارب ڈالر ءِ سرمایہ کاری ءِ گمان اِنت وھدیکہ آیوکیں دو ماہ ءَ ریکو دیک منصوبگ ءِ مراگش مزن وزیر کارگس ءَ دارگ بیت۔ آئی ءَ گیش تران کت کہ پاکستان زوت چار سد ہزار ٹن پوپل ءِ برآمد کنگ ءِ اہل بیت ۔ راجی ایمنی ءِ ھوالگ ءَ جستے ءِ سر ءَ علی پرویز ملک ءَ گوشت کہ سیاست ءَ را راجی سیت ءَ چہ جتا دارگ المی انت۔ آئی ءَ گوشت کہ پاک فوج ءِ سپاھیگ ھمک روچ وتی جاناں ندر کنگ ءَ اَنت، اے وڑیں جاور ھال ءَ ادارگ آناں بے شرپ کنگ ھچ رنگ ءَ منگ نہ بیت، ڈی جی آئی ایس پی آر ءَ سک باز زمہ وار ءُ سوچنی پوزیشن پیش کتگ۔ دگہ جُستے ءِ پسہ ءَ آئی ءَ گوشت کہ ریاست مدام ھست ءُ کجام ھم سیاسی گل ءِ سر ءَ بندش ایر کنگ ھژدری نہ اِنت بشرطیکہ آ پٹرول بمب اُرش ءِ وڑیں زوراکی ءِ گامگیجاں چہ پھریزگ ءَ وتی سیاسی عمل ءَ برجاہ بہ دار ایت۔ تحریک انصاف وتی ردیانی سرپد بہ بیت پرچاکہ سیاست ءُ ناشرکاری ءِ نیام ءَ پدریں پرک است انت۔ فیلڈ مارشل عاصم منیر ءِ نوٹیفکیشن ءِ سر ءَ تران کنان ءَ آئی ءَ گوشت کہ ایشی ءِ مول ءُ مراد توامیں فورسز ءِ نیام ءَ ھمگرنچی ءَ را گیش موثر جوڑ کنگ انت۔ اگاں ادارہ یکجاہ بہ بنت گڈا مزنیں دژمن ہم ہلاس بوت کنت۔