امن و ایمنی نا اڈ تننگ و الس نا جان و مال ئِ رکھ تننگ ننا اولین اولیتئِ، ایس پی ہرنائی عبدالحلیم اچکزئی

ہرنائی۔ 11جولائی (اے پی پی) ایس پی ہرنائی عبدالحلیم اچکزئی پارینے کہ امن و ایمنی نا اڈتننگ و الس نا جان و مال ئِ رکھ تننگ ننا اولین اولیت و ننا فرض ئِ۔ چنکا عئید انا وخت آ سیکورٹی نا فل پروف بست و بند کننگا غٹ مسیت ، عئید گاہ و سیل و سواتی ہند آتیا پولیس نا بھلو نفری اس تعینات کننگاسس۔ صوبہ نا مر مر انگا علاقہ غاتیان خلقت آک ہرنائی ئِ کنڈ ئِ ہلکر و سیل و سواتی ہند آتیا عئید ئِ امن و سکون اٹ گدریفیر ۔ داخیال آتا درشانی ئِ او تینا ہنکین آ ہندی صحافی ، قبائلی معتبر ین سیاسی جماعت آتا عہدیدار آتا کنڈآن عئید انا مبارکبادی تننگ نا وخت آ ہیت وگپ کرسا کریر۔ اوپارے کہ عئید انا وخت آ غٹ مسیت ، عئید گاہ و شار اٹی امن و ایمنی ئِ برقرار تخنگ آن بیدس ہرنائی نا خڑک انا علاقہ ہراڑے سیل و سواتی ہند آک ئسر پولیس نا کنڈآن سیکورٹی نا فل پروف بست و بند کرسا پولیس نا بھلو نفری اس تعینات کرسا پولیس آفیسر آتا ڈیوٹی ئِ خلسا سیکورٹی بست و بند آتا چاروکی ئِ کریرہ اوکان بیدس لیویز فورس ہم بی ایریا ٹی سیل و سوات ہند آتیا سیکورٹی نا فل پروف بست وبند کریسس ۔ ڈپٹی کمشنر عصمت اللہ قریش ہندی صحافی تتون ہیت وگپ کرسا پارے کہ عئید انا وخت آ لیویز ایریا ٹی ساڑی سیل و سواتی ہند آتیا لیویز فورس انا بھلو نفری اس تعینات کننگاسس ہرانا سوب مچ آ ضلع ٹی ناخوشگوار واقعہ پیش بتو۔ اوپارے کہ ضلعی انتطامیہ بلاتمیز پولیس و لیویز ایریا ئِ اسہ پلو تخسا ننا مسخت ضلع ٹی امن و ایمنی نا اڈتننگ و الس نا جان و مال ئِ رکھ تننگ نائِ ہراڑکن ضلعی انتطامیہ غٹ وسیلہ غاتے کاریم اٹ ہتنگ ئِ اوپارے کہ امن وایمنی نا اڈتننگ اٹی الس نا ہم انتطامیہ تون کمک المی ئِ۔