کوئٹہ۔ 11جولائی (اے پی پی) مسکوہی وزیراعلیٰ بلوچستان و بلوچستان نیشنل پارٹی نا بنجائی صدر سردار اختر جان مینگل گوادر پورٹ انا اختیار آتے بلوچستان ئِ تننگ گوادر اٹی ہندی ورناتا پیشہ ورانہ لائخی تے ٹی ودکی کن ٹیکنیکل کالجز و ٹریننگ سینٹر و میرین یونیورسٹی نا اڈ تننگ، ماہی گیر آتا ویل انا ایسری گوادر نا شاری تے صاف دیر انفراسٹرکچر و بلاتعطل برقی ترسیل نا فراوانی و گوادر اٹی زرکاری نا بابت ہندی خلقت آتا شریداری ئِ باوری جوڑ کننگ کون آ خواست کرسا سے شنبے 12جولائی آ اسلام آباد اٹی مچ آ پاکستان نا صحافی ، دانشور، وکیل برادری و ادیب آتے پت اٹی ہلنگ کن اسہ دے ئی سیمینار اڈ ترفنگ نا فیصلہ کرینے۔ داہیت ئِ بلوچستان نیشنل پارٹی نا بنجائی جنرل سیکرٹری سینیٹر ڈاکٹر جہانزیب جمالدینی دوشنبے آ ”اے پی پی“ تون ہیت وگپ کرسا پارے۔ سینیٹر ڈاکٹر جہانزیب جمالدینی پارے کہ بی این پی مینگل اسہ پرامن سیاسی و جمہوری جماعت اسے نن پارلیمنٹ و جمہوریت آ پوروی اٹ باور کینہ ہنداخاطران بلوچستان نیشنل پارٹی پاک چین اقتصادی راہداری و گوادر اٹی شون و شونہالی نا ڈٹ آتا ہرگز مخالف اف ولے دا ڈٹ آتے ٹی ہندی خلقت آتے اولیت ترسا مکران ڈویژن نا الس ئِ غٹ میگا پروجیکٹس آتے ٹی شریک کننگے اوبنجائی حکومت آن خواست کرے کہ پاک چین اقتصادی راہداری ڈٹ انا بنجائی شار گوادر نا شاری تا نیزگاری و پسماندگی ئِ مر کننگ کن اوفتے مفت تعلیم ، جان جوڑی نا آسراتی تتون اوار اوار ٹیکسز و یوٹیلٹی بلز آتا مد اٹی چھوٹ تننگ کن خصوصی پیکج نا پڑوئِ کننگے۔ سینیٹر ڈاکٹر جہانزیب جمالدینی پارے کہ وزیراعظم محمد نواز شریف نا کماشی ٹی آل پارٹیز کانفرنس نا قرارداد آتیا عملدرآمد ئِ باوری جوڑ کرسا پاک چین اقتصادی راہداری ڈٹ انا دیکی روٹ ئِ اول پورو کننگے و خیبر پختونخوا ، پنجاب و بلوچستان نا پسماندہ علاقہ غاتا الس ئِ اقتصادی راہداری ڈٹ انا غٹ اجزاتیان مستفید کننگے۔
