پریس کونسل آف پاکستان نا میڈیا نا بابت آن جوڑ کروک آ ضابطہ اخلاق آ عملدرآمد نا بابت بلوچستان نا صحافیک نن تون کمک کیر، بلوچستان نیمہ پاکستان و ملک انا اہم ئُ صوبہ اسے، بلوچستان اٹی پریس کونسل نا زونل دفتر نا اڈتننگ نا بابت وزیراعلیٰ بلوچستان نواب ثناءاللہ خان زہری ئِ پنچ کروڑ روپئی نا گرانٹ نا فراوانی نا بابت مراسلہ راہی کرینے
کوئٹہ۔ 11جولائی (اے پی پی) پریس کونسل آف پاکستان نا چیئرمین ڈاکٹرمحمد صلاح الدین مینگل پارینے کہ میڈیا راج انا خن، بامس و دماغ ئِ ، صحافی سنسی خیز خبر آتیان بیدس حق آتیا مبنی و السی ویل آتے تالان کننگ کن رپورٹنگ نا دودوربیدہ ئِ مون آ دیر۔ داخیال آتا درشانی ئِ او کوئٹہ پریس کلب نا کنڈآن اونا اعزاز اٹی تروک آ بیابخیری دود آن تران کرسا کرے۔ داوخت آ کوئٹہ پریس کلب نا صدر شہزادہ ذوالفقار احمد ، جنرل سیکرٹری خلیل احمد، بلوچستان یونین آف جرنلٹس نا صدر حماداللہ سیاپاد، پریس انفارمیشن ڈیپارٹمنٹ نا ڈائریکٹر عبدالمنان و سینئر صحافی تا بھلو کچ اس ساڑی ئسک۔ ڈاکٹر محمد صلاح الدین مینگل پارے کہ بلوچستان نیمہ پاکستان و ملک انا اہم ئُ صوبہ اسے۔ بلوچستان اٹی پریس کونسل نا زونل دفتر نا اڈتننگ نا بابت وزیراعلیٰ بلوچستان نواب ثناءاللہ خان زہری ئِ پنچ کروڑ روپئی نا گرانٹ نا فراوانی نا بابت مراسلہ راہی کرینے۔ اوپارے کہ پریس کونسل آف پاکستان نا میڈیا نا بابت جوڑ کروک ضابطہ اخلاق آ عملدرآمد نا بابت بلوچستان نا صحافیک نن تون کمک کیر و دا چرجوئی ٹی او زوت یونیورسٹی تا جرنلزم نا بشخ و اخبار آتا دفتر آتا دورہ ئِ کرسا پریس کونسل آف پاکستان نا غرض ومسخت آن اودے معلومداری ایترہ۔ ڈاکٹر محمد صلاح الدین مینگل پارے کہ پریس کونسل صحافی تا شرحالی کن اڈ تروک آ ادارہ ئِ ۔ ہنداخاطران گرج داہیت انا ئِ کہ صحافی و پریس کونسل نا نیام اٹ اڈ ہلوک تعلق ئِ پین سوگو کننگے۔ اومستی پارے کہ پریس کونسل آف پاکستان نا 18باسک ئُ و بنجائی حکومت پریس کونسل آف پاکستان نا فنڈز اِرا کروڑ 90لکھ آن ودفسا چارکروڑ کرینے ہراکہ خوش آئند گام اسے۔ داوخت آ کوئٹہ پریس کلب نا صدر شہزادہ ذوالفقار تران کرسا کوئٹہ پریس کلب بننگ آ چیئرمین پریس کونسل آف پاکستان ڈاکٹر محمد صلاح الدین مینگل نا منت واری ئِ ادا کرسا پارے کہ پریس کونسل آف پاکستان نا چیئرمین نا اولیکو وار کوئٹہ آن گچین بلوچستان نا صحافی تے کن اعزاز و فخر انا ہیت اسے ننے اومیت ئِ کہ ڈاکٹر صلاح الدین مینگل پریس کونسل ئِ اسہ فعال و گچین ادارہ اس جوڑ کننگ تون اوار اوار بلوچستان نا صحافی تے کن شرحالی و اوفتا ویل آتا ایسری کن اسہ توانا ئُ تواراس چست کیک۔
