برلن۔ 11جولائی (اے پی پی) اسپیکر قومی اسمبلی سردارایاز صادق پارینے کہ پاکستان و جرمنی ڈیہہ ٹی امن و سوگوی نا اڈتننگ نا بابت اسہ وڑنا موقف تخرہ و ہڑتوم آ ملک آک شون و اسیجائی مفادات آتا دوئی کن تین پہ تینی کمک نا چرجوئی ئِ برجاءتخرہ۔ اوداڑے تینا جرمن ہم منصب پروفیسر نوربرٹ لیمرٹ تون جرمن پارلیمنٹ اٹی اوڑدہی کرے ہراٹی ہڑتوم آ راہشونک ہڑتوم آ کنڈآتا تعلقداری تے ٹی سوگوی کن پارلیمانی و السی کہول آ رابطہ غاتے ٹی ودیکی آ اتفاق کریر۔ داوخت آ اسپیکر قومی اسمبلی سردار ایاز صادق پارے کہ پاکستان جرمنی تون کیہی دہائی تیا تالان سنگتی ئِ سوگوی نا کسر آ روان تخنگ نا خواہندار ئِ۔ اوپارے کہ جرمنی پاکستان نا خڑکی اتحادی ئِ و مشکل نا ساہت اٹی پاکستان نا کمکار ثابت مسنے۔ اوکان گڈ اسپیکر قومی اسمبلی جرمن پارلیمنٹ نا جتا پارلیمانی کمیٹی تتون اوڑدہی کرے ہرافتے ٹی کمیٹی برائے اقتصادی کمک و شون، دفاعی کمیٹی، خارجہ امور کمیٹی و سویلی ایشیائی سنگتی رڑ اوارے۔ جرمن پارلیمنٹ نا صدر پروفیسر نوربرٹ لیمرٹ نا کنڈآن اسپیکر قومی اسمبلی نا اعزاز اٹی ارغ ہم تننگا۔ اسپیکر قومی اسمبلی جرمن تھنک ٹینک ایس ڈبلیو پی و جرمن انسٹیٹیوٹ آف انٹرنیشنل اینڈ سیکورٹی افیئرز آن ہم تران کرے و پاکستان نا خارجہ پالیسی نا اہم معاملہ غاتیا روشنی شاغار۔ جرمنی نا دورہ ٹی اسپیکر قومی اسمبلی میزبان ملک اٹی جتا معاملہ غاتیا پاکستان نا پبی نمائندگی ئِ کرے۔ علاقائی و بین الاقوامی معاملہ غاتون اوار پاکستان نا ہمسایہ ملک آتون پرامن مذاکرات ئِ برجاءتخنگ نا خواہش آ ہم ہیت و گپ کرے۔ دورہ نا وخت آ اسپیکر قومی اسمبلی پاکستان نا ترندی اٹ گچین مرسا معاشی حالیت و زرکاری کن گچین چاگڑد نا دستیابی نا بابت آن ہم معلومدار کرے۔
