اسلام آباد۔03جولائی ( اے پی پی) مزن وزیر محمد نواز شریف ئَ چترال ئَ ترندیں ھورءُ ھار ئِ سببئَ بوتگیں جانی ءُ مالی تاوان ئِ سرئَ دل ئِ جُہلانکی ئَ گمءُ ڈُکھ ئِ درشانی کتگ۔ شمبے ئِ شپ ئَ چترال ئِ دمگ عرسونئَ ترندیں ھورءُ ھار ئِ سببئَ مسیت کہ آئی ئِ تہا مردم نماز وانگئَ بوتگ اَنت ھوار بازیں لوگ ءُ جاھے کپتگ اَنت۔ یک شمبے ئِ روچئَ مزن وزیر گس ئِ نیمگئَ چہ شنگ بوتگیں پریس ریلیز ئِ تہا گشگ بوتگ کہ مزن وزیر ئَ دعا کتگ کہ اللہ تعالیٰ بیران بوتگیں مردماناں جنت الفردوس ئَ جا گہ بہ دنت ءُ آماچیں ھانداناں سگءُ اوپار بہ دنت۔ آئی ئَ گشتگ کہ نیشنل ڈیزاسٹر منیجمنٹ اتھارٹی ءُ دگہ بنجاھی ریسکواینڈ رلیف ئِ ادارگ آناں پنت ءُ شون کتگ کہ ھارئِ تہا گٹ بوتگیں ءُ بُھک اِتگیں مردمانی درگیجگ ئِ ھاترئَ آماچیں دمگاں کاروائی گشاد کنگ بہ بنت تنکہ ضلورت مندیں مردماناں زوت کمک پھجارینگ بہ بیت۔ مزن وزیر ئَ چترال ئَ ھورءُ ھارئِ جاورھال ئِ ھوالگ آئی ئَ را سرپد کنگئِ ھم پرمان داتگ۔
