تاشقند۔ 24جون (اے پی پی) صدر مملکت ممنون حسین پارینے کہ شنگھائی کمکار تنظیم نا پورو باسک نا حیثیت آن پاکستان دا تنظیم تون تینا رابطہ غاتے پین سوگو جوڑ کیک و علاقائی امن و سوگوی و شون اتون اوار اوار دہشت گردی و انتہاءپسندی نا برخلاف ہم تینا کڑدئِ پبی وڑاٹ ادا کرسا کیک انتئے کہ دا تنظیم یورپ ایشیاٹی جغرافیائی سیاست اٹی مثبت تبدیلی نا بھلا ذریعہ ثابت مریک۔ اوداہیت ئِ جمعہ آ داڑے شنگھائی کمکارتنظیم نا سروک دیوان آن تران کرسا پارے۔ صدر مملکت ممنون حسین پارے کہ پاکستان د اتنظیم نا باسک نا حیثیت آن ”شنگھائی اسپرٹ“ نا رداٹ باسک ملک آتون تینا تعلقداری تے پین مون آ دیک۔ اوپارے کہ پاکستان نا شنگھائی کمکار تنظیم نا باسک ملک آتون بے کچ بھلن تاریخی و دودوربیدہ ہی رابطہ غاتیان بیدس سوگو اقتصادی و اسٹریٹجک تعلقداریک اریر ہراڑآن ظاہر مریک کہ ننا مفادات و است خواہی تے ٹی بھلو کچ اسیا ہم آہنگی خننگک۔ نن پہہ مرینہ کہ اقتصادی شون انا رداٹ ننا الس نا تغ ہمووخت اسکان پورو مننگ کپک ہراوخت اسکان علاقائی امن و سوگوی ئِ لاحق خلیس آتا چٹفنگ کن پبی وڑاٹ کاریم نہ کننگپ۔ صدر مملکت پارے کہ شنگھائی کمکار تنظیم پاکستان ئِ سویلی ایشیاء، اوغانستان و ڈیہہ نا ایلو بشخ آتے ٹی امن وسلامتی نا مون آ دننگ کن مفید پلیٹ فارم اس فراوان کیک ہرا علاقائی سوگوی و معاشی شون انا بنداو ئِ۔ داچرجوئی ٹی اوغانستان اٹی امن المی ئِ۔ اوپارے کہ پاکستان ئِ داوخت اٹی دہشت گردی نا قبیح چیلنج آتا مون تروکی ئِ ہراڑتون مون تننگ کن نن دہشت گردی نا خاتمہ و تینا سیم تا سیکورٹی ئِ باوری جوڑ کننگ خوانہ۔ اوپارے کہ پاکستان دہشت گردی، انتہاءپسندی و جتائی پسند عنصر آتیان جنگ اٹی بھلو قربانی تسنے۔ دا چرجوئی ٹی ہراوخت آ گرج پیش بس پاکستان بدی نا دا واک آتا برخلاف پبی عزم اتون واک ئِ کاریم اٹ ہتیک و پاکستان داساہم دہشت گردی نا ہر دوشم نا برخلاف جنگ اکن پرعزم ئِ۔ اوپارے کہ سیکورٹی فورسز آتا کنڈآن آپریشن ضرب عضب نا رداٹ دہشت گردی نا برخلاف بے پرخ کارروائی کننگ انگ ئِ۔ نن دا جنگ اٹی غیر معمولی سرسہبی دوئی کرسا جنگ انا پانسہ ئِ چپی کرینن۔ داآپریشن نا رداٹ دہشت گرد ی نا ڈھانچہ ئِ پورو بھس کننگانے و دہشت گردآتا صفایا ئِ کننگانے۔ صدر مملکت پارے کہ پاک چین اقتصادی راہداری نا جوڑ جاڑ آ کاریم زور و شورا ٹ جاری ئِ ہرا شنگھائی کمکار تنظیم نا باسک ملک آتے بحیرہ عرب و سویلی ایشیاءاسکان رسینگ نا اسہ قدرتی ذریعہ اس فراوان کیک۔ اوپاکستان نا پبی تائیدو مخ تفی ئِ کننگ آ غٹ باسک ملک آتا منت واری ئِ ادا کرسا پارے کہ شنگھائی کمکار تنظیم و پاکستان کن اینو نا دے بے کچ اہم ئِ انتئے کہ دا تنظیم دادے تے ٹی تینا پانزدہ می سال دے ئِ اڈتننگ ئِ و پاکستان دا باوقار ادارہ نا میمورنڈم آف اوبلی گیشنز آ دستخط کرینے۔ اوپارے کہ پوسکن آ باسک آتون شنگھائی کمکار تنظیم نا مون آ بروک آ وجود ڈیہہ ٹی ننا سلامتی و شونہالی نا اسیجائی مسخت ئِ باوری جوڑ کیک۔ داکان مست ازبک صدر اسلام کریموف دیوان اٹی ایس سی او و راہشون آتا خیرمقدم ئِ کرسا پارے کہ ایس سی او ملک آک تین پہ تین کمکاری نا ذریعہ ڈیہہ ٹی امن و شونہالی اتیرہ ۔ ایس سی او نا سیکرٹری جنرل راشد علیموف ایس سی او نا اہمیت و تنظیم نا چارٹر نا روشنی ٹی اونا سرجزآتے تالان کرے۔ وزیراعظم نا سلاہکار خارجہ امور سرتاج عزیز ، خارجہ سیکرٹری اعزاز احمد چوہدری و ازبکستان اٹی پاکستان نا سفیر ریاض بخاری ہم داوخت آ ساڑی ئسرہ۔
