کوئٹہ۔ 24جون (اے پی پی) کوئٹہ نا علاقہ ایئر پورٹ روڈ عالمو چوک انا خڑک آ بمب دھماکہ ٹی اسہ بندغ اس تپاخت کرے وخت اس کہ 10بندغ ٹھپی مسر۔ پولیس نا رداٹ جمعہ آ صوبائی دارالحکومت نا گنجان آباد علاقہ عالمو چوک انا خڑک بمب دھماکہ مس ہرانا نتیجہ ٹی اسہ بندغ اس تپاخت کرے وخت اس کہ 10 ٹھپی مسر۔ پولیس و سیکورٹی فورسز آک موقع غا سرمرسا ٹھپی تے دمدستی وڑاٹ ہسپتال آ گدریفیرہراڑے اوفتے طبی امداد تننگ انگ ئِ۔ دھماکہ نا خڑک سلوک گاڈی و رکشہ غاتے نسخان رسینگا۔ پولیس و سیکورٹی فورسز آک علاقہ نا ناکہ بندی ئِ کرسا دوبہ دار آتا پٹنگ نا بنائِ کریر۔ وزیراعلیٰ بلوچستان نواب ثناءاللہ خان زہری دھماکہ نا ترند انگا لوزآتے ٹی مذمت ئِ کرسا ضلعی انتطامیہ و سیکرٹری جان جوڑی ئِ پارت کرے کہ ٹھپی تے درمان نا ہروڑنا آسراتی تننگے۔ اوکان بیدس کوئٹہ نا گنجان آباد علاقہ عالمو چوک اٹی دھماکہ غان گڈ پولیس و کانود نافذ کروک آ ادارہ غاک جمعہ مبارک نا مچی تا بابت کوئٹہ نا کیہی مسیت و امام بارگاہ تا سیکورٹی ئِ سخت کریر وخت اس کہ شار انا پترینگوک و پیش تموک آ کسر تیا پولیس نا بھلو نفری اس تعینات کننگا و گاڈی و موٹرسائیکل آتے جوانی اٹ پٹنگ آن گڈ اوفتے شار اٹی پترینگ انگ نا موکل تننگا۔
