تاشقند۔ 24جون (اے پی پی) پاکستان شنگھائی کمکار تنظیم (ایس سی او) نا پورو باسک جوڑ کننگ کن میمورنڈم آف اوبلی گیشنز آ جمعہ نا دے دستخط کرے ہرا روس، چین و نیامی ایشیاءنا ایلو ملک آتیا تالان سیکورٹی ، معیشت و توانائی کمک نا اسہ کلیدی تنظیم اسے۔ صدر مملکت ممنون حسین ازبک دارالحکومت اٹی اڈ ہلوک آ ایس سی او سروکان مملکت کونسل نا 16می دیوان اٹی دستخط نا دود اٹی پاکستان نا نمائندگی ئِ کرے وخت اس کہ وزیراعظم نا سلاہکار خارجہ امور سرتاج عزیز یات داشت آ دستخط کرے۔ دستاویز آ دستخط آن پاکستان پورو باسک جوڑ مننگ نا بابت اسہ بھلو گام اسیان گدرینگانے وخت اس کہ دا 2005 ءآن مبصر نا حیثیت آن تنظیم نا بشخ مسنے۔ سروک دیوان اٹی بھارت ہم پاکستان تو ن اوار میمورنڈم آ دستخط کرے ہرا تنظیم نا ودکی نا چرجوئی ٹی اسہ اہم ئُ گام اسے۔ دستخط آن باسک ملک انا حیثیت آن پاکستان و بھارت نا اوار مننگ نا عمل نا بناءمسنے۔ داکان مست ایس سی او ٹی پاکستان و بھارت نا اوار مننگ کن جولائی 2015ءٹی روس انا شار اوفاٹی اڈ ہلوک آ ایس سی او سروک دیوان اٹی منظوری تننگاسس۔ چین، روس، قزاخستان، ازبکستان و تاجکستان تون اوار باسک ملک انا وزیر خارجہ غاک تدوک آ تو پاکستان و بھارت کن میمورنڈم آف اوبلی گیشن اختیار کریسر۔ پاکستان نا رکنیت نا روس اتون عسکری و تکنیکی کمکاری و چین اتون بھلا مواصلات ڈٹ آتیان بابت کیہی اہم معاملہ غاتیا گچین زئم تمک۔ ایس سی او پاکستان ئِ ڈیہہ ٹی سوگو ہند و چین ، روس و نیامی ایشیائی ریاست آتیا تالان گروپ اتون وسیلہ غاتسکان گیشتر رسینگ نا بابت آن وارخواہی ہم فراوان کیک۔ داوخت چین ، روس، قزاخستان، کرغزستان ، تاجکستان و ازبکستان اونا پورو باسک ئُ وخت اس کہ ایران ، اوغانستان م، بیلا روس و منگولیا ئِ مبصر نا درجہ دوئی ئِ۔
