کوئٹہ۔ 22جون (اے پی پی) صوبائی سلاہکار صنعت سردار درمحمد خان ناصر بروک آ مالی سال انا صوبائی بجٹ ئِ تاریخی و الس دوست گوندسا پارینے کہ 71.184 ارب روپئی نا ریکارڈ شونداری پروگرام السی مفاد نا اہم شونداری ڈٹ و گام گیج آتے کن جتا کننگانے وخت اس کہ کوئٹہ شار اٹی گرین بس سروس نا بناءکن 1ارب جتا کننگانے و وزیراعلیٰ پروگرام نا رداٹ ڈویژنل ہیڈ کوارٹرز نا بنداوی ڈھانچہ نا گچینی کن 3.50 ارب روپئی جتا کننگانے ۔ داخیال آتا درشانی ئِ او ”اے پی پی“ تون ہیت وگپ کرسا کرے۔ اوپارے کہ وزیراعلیٰ بلوچستان نواب ثناءاللہ خان زہری تینا سیاسی اتحادی تا صلابت آن صوبہ ئِ اسہ انقلابی ئُ بجٹ اس تسنے ہرا اونا سیاسی بصیرت و صوبہ نا الس تون مابت نا پیدوار و شاہدی سے ۔ صوبائی سلاہکار پارے کہ وزیراعلیٰ صوبہ نا شون نا صفا ایجنڈہ تخک ہراڑآ پدریسہ عملدرآمد نا بناءکننگانے وزیراعلیٰ نا غٹ آن بھلا جوانی دادے کہ او غٹ ئِ اوار دننگ آ یخین تخک و صوبہ نا غٹ علاقہ غاک اوڑکن اسہ وڑنا اہمیت تخرہ ہنداسوب ئِ کہ صوبہ نا تاریخ اٹی اولیکو وار صوبائی بجٹ اٹی غٹ ضلع غاتے اسہ وڑنا اہمیت دوئی ئِ و الس صوبائی بجٹ ئِ پبی پذیرائی تسنو۔
