کوئٹہ۔ 22جون (اے پی پی) صوبائی وزیر ریونیو و ٹرانسپورٹ شیخ جعفرخان مندوخیل پارینے کہ دابجٹ صوبہ نا اقتصادی شون انا بنداو ثابت مریک و الس نا اومیت آتیا پورو سلک۔ تاریخی بجٹ ترسا داثابت کرینو کہ ساڑی آ حکومت صوبائی شون و شونہالی و الس نا شرحالی نا وعدہ غاتے پورو کننگ ئِ۔ داخیال آتا درشانی ئِ او ”اے پی پی“ تون ہیت وگپ کرسا کرے ۔ اوپارے کہ دابجٹ صوبہ نا متوازن شون نا بنداو ثابت مریک۔ بے روزگاری نا ویل اتون مون تننگ کن 332پوسکن ئُ آسامی تخنگانے تانکہ الس ئِ روزگار نا موقع دو برے و بلدیاتی ادارہ غاتے کن 5 ارب روپئی جتا کننگ آن کوئٹہ شار شون ہلوک جوڑ مریک۔ اوپارے کہ کوئٹہ ئِ پٹ فیڈر کینال آن دیر انا فراوانی کن 40 ارب روپئی تخنگانے وخت اس کہ بلوچستان ریونیو اتھارٹی نا اڈتننگ، خراج آتا وصولی نا نظام نا کمپیوٹرائزیشن ئِ کننگک۔ اوپارے کہ ژوب شار اٹی اُرا اُرا کنوئی ئُ صاف دیر انا فراوانی کن واٹرسپلائی نا ڈٹ ئِ ہنداسال انا ایسر اسکان پورو کننگک۔ اوتینا ذاتی فنڈ آن پانزدہ کروڑ روپئی جتا کرینے تانکہ ژوب شار انا غٹ محلہ غاتے ٹی دیر انا کاختی نا خاتمہ مننگ کے۔ جعفر خان مندوخیل پارے کہ سلیازئی آن ژوب دیر انا دا عظیم ڈٹ ئِ ہر بہاءغا اینخو نا سال اٹی پورو کننگک و داڑکن فنڈز انا فراوانی اونا اولین اولیت ئِ داڈٹ انا رداٹ ژوب اٹی شاغوک دیر انا متکن آ پیپ لین آتے کشسا پوسکن ئُ پیپ لین شاغنگک و شار انا غٹ علاقہ غاتے کنوئی آ دیر فراوان کننگک۔ اوپارے کہ ننا سیاست خوشنما نعرہ و خالی دنیا غا تالان اف۔ جعفرخان مندوخیل پارے کہ دیر اکن ایلو سورس ئِ شیخان آن اتسا ایتنہ و محکمہ ئِ پی سی ون تیار کننگ نا احکامات تننگانے وخت اس کہ ساڑی آ حالیت آتے ٹی ہرا 70 درسد کنوئی آ دیر زیان مننگ ئِ اوفتے ہم تورینہ تانکہ دیر ئِ بچفنگے۔
