اسلام آباد۔ 22جون (اے پی پی) صدر مملکت ممنون حسین دا ہیت آ زورشاغانے کہ اوغان مہاجر آتا پدی ہِننگ بے کچ المی و ڈیہہ ٹی سوگو امن و شون اکن پاکستان نا کوشست آتا جزولاینفک ئِ، بین الاقوامی برادری دا مسخت نا دوئی کن اواری اٹ کاریم کیر۔ اوداہیت ئِ اقوام متحدہ نا ہائی کمشنر برائے پناہ گزین فلیپو گرانڈی تون ہیت وگپ کرسا پارے ہرا چارشنبے آ ایوان صدرا ٹی اوڑتون اوڑدہی کرے۔ بنجائی وزیر سیفران لیفٹیننٹ جنرل (ر) عبدالقادر بلوچ ہم دا وخت آ ساڑی ئس۔ صدر مملکت ممنون حسین پاکستان اٹی یو این ایچ سی آر نا خیرم مقدم ئِ کرسا پارے کہ پاکستان اوڑتون ملک آن غٹ اوغان مہاجر آتا زوت پدی ہِننگ نا اونا اولیتی مسخت نا بارواٹی ٹھوس نتیجہ غاتا دوئی کن اواری اٹ کاریم کننگ نا خواہندار ئِ۔ اوپارے کہ بین الاقوامی برادری آ مہاجرآتا کاز انا بابت بھلو زمہ واری اس مریک۔ اوپارے کہ پاکستان مسہ دہائی آن زیات وخت اسے آن تینا گل زمین آ لکھ آ اوغان مہاجر آتا میزبانی ئِ کرسا دابابت نمان کڑد ادا کرینے۔ صدر ممنون حسین پارے کہ مہاجر آتا دیکی نا کنڈابھلو کچ اسیا ہجرت نا نتیجہ ٹی داسا مہاجر آتا ویل انا جہت و نوعیت نا بارواٹی گچین افہام و تفہیم و احساس خننگک۔ او داہیت آ زورشاغار کہ اوغان مہاجر آتا میزبانی آن سیاسی، راجی و اقتصادی ، سلامتی و ماحولیاتی نتیجہ غاتون منسلک پاکستان نا قربانی تے داسا دیکی دنیا ئِ اوفتا گچین وڑاٹ ستائِ کروئی مرے۔ صدر داہیت آ ہم زورشاغا کہ پاکستان ڈیہہ ٹی امن و سوگوی کن اوغان مہاجر آتا تینا وطن آ پدی ہِننگ نا بابت جائز اومیت تخک۔ اوداہیت آ زورشاغا کہ دنیا ئِ دہشت گردی و انتہاءپسندی نا لعنت تون مون تننگ کن سخت کوشست آتا گرج ئِ تانکہ مچ آ دنیا ٹی امن و سوگوی ودی مرے و دنیا نا غٹ بشخ آتے ٹی مہاجر آتا تنکی چٹے۔ اقوام متحدہ ہائی کمیشن مہاجرین فلیپو گرانڈی بھاز بھلو کچ اسے ٹی اوغان مہاجر آتا میزبانی ئِ کننگ اٹی پاکستان نا کمک کننگ آ اونا منت واری ئِ ادا کرسا پارے کہ اونا ادارہ اوغان مہاجر آتا تینا وطن آ پدی ہِننگ کن سازگار چاگڑد ودی کرسا اوفتا دیرینہ ویل انا ایسری کن کوشست کیک۔ صدر فلیپو گرانڈی ئِ اقوام متحدہ نا ہائی کمشنر مہاجر آتا حیثیت آن تقرری آ مبارکبادی تس۔
