اسلام آباد۔ 20جون (اے پی پی) نیشنل پریس کلب نا روچہ خاہوت فیسٹیول نا چرجوئی ٹی مسٹ میکو پروگرام اڈ ہلک ہراٹی جفت انگا شارتا صحافی و اوفتا خاہوت آک بھلو کچ اسے ٹی شرکت کریر۔ داوخت آ چناتے ٹی نعتیہ مقابلہ غاتیان گڈ نقد انعام بشخ وپانٹ کننگا وخت اس کہ نیاڑی تے کن بیوٹیشن کلاسز نا بست و بند کننگا۔ خاہوت فیسٹیول اٹی مسلم لیگ (ن) نا باسک قومی اسمبلی شکیلہ جلیل و مسکوہی باسک مصطفی نواز کھوکھر شرکت کریر۔ داوخت آ مصطفی نواز کھوکھر پارے کہ نیاڑی تا حق و اوفتا فرض انا احاطہ مذہب اسلام آن زیات ہچ گہس کتو۔ نیاڑی تا مون آ بننگ آن ہی راج و ملک شون ہلیک۔ نیشنل پریس کلب کلچرل سرجزآتا بابت منفرد ہند اس تخک۔ دابابت پریس کلب نا سروک خراج تحسین نا حقدار ئِ۔ شکیلہ جلیل پارے کہ نیشنل پریس کلب دودوربیدہ سرجز آتے ٹی اسہ اہم ئُ ہند اس تخک و پریس کلب نا سروک دابابت خراج تحسین نا حقدار ئِ۔ اوپارے کہ راج اٹی نیاڑی تے اوفتا جائز ہند تننگے، نیاڑی تیا جسمانی بیدادی اسہ فکر اسے۔ اسلام نیاڑی تا حق آ زور شاغک۔ اوکان مست پریس کلب نا صدر و سیکرٹری غٹ باسک و اوفتا خاہوت آتے پروگرام اٹی بننگ آ ببو خیرٹ پارے۔
