کوئٹہ۔ 20 جون (اے پی پی) پاکستان مسلم لیگ (ن) بلوچستان نا سینئر نائب صدر ملک ظاہر خان کاکڑ وزیراعلیٰ بلوچستان نواب ثناءاللہ خا ن زہری ئِ الس دوست متوازن و تاریخی بجٹ پیش کننگ آ مبارکباد ترسا پارے کہ بجٹ مالی سال انا وخت دوئی مروک آ محاصل و خڑچ آتا تخمینہ مننگ تون حکومت نا اولیت آتا عکاس ہم مریک ۔ داہیت ئِ او دوشنبے آ ”اے پی پی“ تون ہیت وگپ کرسا پارے۔ ملک ظاہر خان کاکڑ پارے کہ نواب ثناءاللہ خان زہری متوازن و السی است خواہی تا آئینہ دار بجٹ پیش کرینے ہراٹی تعلیم کن 28ارب 93کروڑ 22لکھ روپئی، جان جوڑی کن 17ارب 36کروڑ 77لکھ روپئی، امن وایمنی کن 30 ارب 25کروڑ روپئی و کشت وکشار کن 7ارب 40 کروڑ روپئی تخنگانے اوپارے کہ بلوچستان نا ذہین و ہونہار طالب علم آتے لیپ ٹاپ آتا فراوانی کن 50 کروڑ روپئی تخنگانے وخت اس کہ 2016-17 ءنا بجٹ اٹی صحافی تا شرحالی فنڈئِ 3 کروڑ روپئی آن ودفسا 20 کروڑ روپئی و پریس کلب کوئٹہ نا سالانہ گرانٹ ئِ 20 لکھ آن اسہ کروڑ روپئی کننگانے۔ اسہ سوج اسینا ورندی ٹی ملک ظاہر خان کاکڑ پارے کہ خوانوک پرامن و شونہال بلوچستان وزیراعلیٰ بلوچستان نواب ثناءاللہ خان زہری نا ویژن ئِ ہرانا پوروی کن بجٹ اٹی تعلیم نا بشخ اٹی 28 ارب 93کروڑ 22 لکھ روپئی نا بھلو زر اس تخنگانے۔
