کوئٹہ۔ 20جون (اے پی پی) سینیٹ نا قائمہ کمیٹی برائے دیر و بجلی نا چیئرمین سینیٹر سردار محمد یعقوب خان ناصر پارینے کہ پاک چین اقتصادی راہداری نا ڈٹ آن دنیا ٹی بلوچستان نا اہمیت اٹی ودکی مسنے وخت اس کہ بنجائی حکومت نا خصوصی توجوہ و است خواہی آن سریس ساحلی پٹی والا شار گوادر بروک آ دور اٹی پاکستان نا معاشی سرجزآتا بنجا و اسہ جہانی واپاری بندرگاہ اسینا حیثیت اختیار کیک۔ داخیال آتا درشانی ئِ او دوشنبے آ ”ایسوسی ایٹڈ پریس آف پاکستان “ تون خصوصی ہیت وگپ کرسا کرے۔ سینیٹر سردار محمد یعقوب خان ناصر پارینے کہ پاک چین اقتصادی راہداری ڈٹ انا است گوادر اٹی فری ٹریڈ زون ، پوسکن بین الاقوامی وڑانا بالی پٹ و بندرگاہ نا جوڑ جاڑ، تعلیمی ادارہ، گوازی نا پٹ و بجلی نا ڈٹ آتیا کاریم ترندی اٹ جاری ئِ ہراڑآن گوادر تون اوار بلوچستان و مچ آملک اٹی معیشت سوگو مریک، بے روزگاری نا چٹفنگ و شونہالی نا پوسکن ئُ دوراسینا بناءمریک ۔ اوپارے کہ پاک چین اقتصادی راہداری صرف اسہ روڈ اسینا پن اف بلکن اوٹی جتا سمندری ہوائی و روڈ آتا جتا کسر تے کاریم اٹ ہتسا اودے گوادر نا کمک اٹ چین اسکان ودفنگک و گوادر ئِ دا ڈٹ اٹی اہم ہند اس دوئی ئِ انتئے کہ ساحلی شار گوادر نا محل و وقوع و اونا جیو اسٹریٹجک اہمیت اقتصادی راہداری نا ڈٹ ئِ توانائی ایتک۔ اسہ سوج اسینا ورندی ٹی سینیٹر سردار محمد یعقوب خان ناصر پارے کہ گوادر اٹی پوسکن بین الاقوامی وڑانا بالی پٹ و بندرگاہ نا جوڑ جاڑ آن گوادر اوغانستان و نیامی ایشیا نا ملک آتے کن بنجائی گزرگاہ (گیٹ وے) اس جوڑ مریک پاک چین اقتصادی راہداری ڈٹ آن بلوچستان اٹی روزگارنا وارخواہی ، بجلی تنکی نا خاتمہ و اقتصادی زونز نا اڈتننگ آن ہندی بندغ آتا تقدیر بدلینگک۔
